期指觀瀾：搵食戰場仍在國期
假期前港股交投相對淡靜，恒指一連三日即市嘗試挑戰20日線（約23,411點），可惜未能收復失地，長假期前恒指最終收23,349點，升15點，十二月期指日市收23,400點，升36點，成交3.3萬張。
十二月期指期權將於周二結算，傳統聖誕及新年假期期間，港股例靜，不過睇嚟今年有機會打破常規，事關港股假期期間，A股破位升穿3,308點，為今輪升浪的收市新高，尤其銀行及券商股上周五升勢相當誇張，無一不升，相信中資金融股成份高的國企指數，今日復市率先嘗試挑戰十二月初造出的11,949點高位，可能性未可抹殺。
今年唔少對沖基金表現失準，主要是去年獲厚利的增長類型股份，好似濠賭、燃氣以及能源股於年終急瀉。反之，基金睇唔起的內銀股，在臨近年尾收爐前，因為發優先股及中國減息的因素而爆升，轉唔切身的基金，一來一回，睇住成個倉非金融類中資股，完全享受唔到半點大市升浪，難受之處實非筆墨所能形容。
同時，金融股似乎又醞釀第二輪升浪，即使最審慎的基金經理，也無可能再坐懷不亂，被迫要追逐升勢。筆者估計，一月的期指客搵食戰場，仍然會是國指而非恒指。
John Mullen