美國CNN尋日公布咗今年十大最佳CEO，蘋果公司（Apple Inc.）嘅庫克當選本年度最佳CEO，而雅虎CEO邁耶就位列第五，原來兩位有個共通點，就係都同已故Apple教主喬布斯有啲關係。
庫克係喬布斯嘅接班人，雖然上任時成日畀人質疑唔夠創意，但近年佢終於擺脫咗教主嘅陰影，唔止推出大屏幕版iPhone 6+，賣到斷晒市，嚟緊又有新搞作，就係智能手錶Apple Watch，庫克今年帶領Apple市值屢創歷史新高，當選第一都可以話係實至名歸。
雅虎嘅邁耶就冇咁好彩，雖然佢一二年接任CEO時做到啲成績，但今年佢就畀班股東由年頭鬧到年尾，皆因佢豪擲金錢收購啲未有咩作為嘅初創企業。
而九月阿里上市時，邁耶淨係沽咗5%股份，當時班股東個個鬧佢攬住15%唔放，依家阿里股份升穿100蚊，先知邁耶係放長線釣大魚，邊個夠膽話佢淨係得個樣 ？
喺前日嘅雅虎業績會，邁耶仲成個喬布斯上身咁，着到靚一靚企喺大屏幕前講解，同啲股東近距離咁交流多啲，希望令班股東對佢改觀啦！
余絲韻