Market Insight：酷派不宜寄予厚望

聯儲局議息一如預期，由聲明中刪除「一段長時間內維持超低利率」的措詞，改為有「耐性」地實施貨幣政策正常化，主席耶倫為免金融市場對美息「首加之期」胡思亂想，特別補充未來數次議息不大可能作出啟動加息決定，仲講明最少兩次，怕大家解讀錯誤。

展望明年，聯儲局例會會期，分別在一、三、四、六、七、九、十及十二月，換句話，最快四月開始加息，稍比現時市場主流預測的六月早。不過，聯儲委員同時對聯邦基金利率預測中值的預測，由上次開會的1.375厘下調至1.125厘，一六年則由2.875厘下調至2.5厘。簡言之，四月開始加到十二月，次次加，連加六次息機會仲係好微。消息一出，道指立即爆升288點。

古勝冇點你2014/12/19

萬里長空

港高樓價泡沫持續

講到尾，美國十一月CPI按月跌0.3%創六年最大單月跌幅，按年升幅收窄到1.3%，同2%通脹目標愈走愈遠，加埋近半年油價大插水對物價的壓抑作用逐步浮現，歐、日、中又驚緊通縮重臨，都係嗰句，美國真係加到息至驚都唔遲。

連跌五日後港股終見反彈，昨升246點收22,832點，上升股份721隻比下跌股份僅多3隻。美國短期加唔到息住，配合政府長遠房屋政策無乜料到，未來五年房屋供應緊張難免，天咁高的港樓，泡沫化好大機會繼續惡化。新地（00016）、長實（00001）、恒基地產（00012）同埋新世界（00017）統統做好。油價下跌，拖累俄羅斯經濟，第一隻中槍係因匯兌損失出盈警的吉汽（00175），昨再插3%收報2.51元，沽空2,180萬股，比周三急跌時的6,700萬稍減，但計沽空比率的話，仲企住19.6%，比前日18.2%高，睇嚟淡友咬住唔放。

不過，數到至誇，肯定是比亞迪（01211）莫屬。昨股價由前收市35.2元，最低插近一半落到18.7元，收25.05元，仍要跌28.8%。午後四圍打探，傳聞滿天飛，有話股東場外衍生工具對賭出咗事，又話其中一款混能汽車被政府剔出補貼名單，之不過，收市前高管早就一一否認，只係股價唔爭氣，彈到26元左右又被沽家壓制。

新能源前景現變數

在下已講過，油價狂瀉後芬佬必有後續動作，頁岩氣、油沙開發商大大鑊，一直享受高溢價的新能源股，真係小心出事。話就話比亞迪股價自九月高位57.8元跌咗唔少，但計落一五年PE依然30倍開外，貴過其他車股三倍。在下見全球最靚造工，最有錢途電動車生產商Tesla，股價由九月初歷史高位291美元撻落200美元邊，咁睇比亞迪被洗亦唔算意外。

小米CEO雷軍上個月話要五至十年間超越三星及蘋果公司，成為智能手機一哥。既非上市公司，講到幾兇殘，實在無人知。直到早排入股美的交易，要向深交所遞交財務，即時露晒底，原來舊年賺3.47億人仔，只及十一月外媒收到風流傳業績的十分之一，或蘋果公司同期營收一百五十分之一。這位中國大衞，要挑戰巨人歌利亞確係夠膽色。計計數，1,870萬部出貨量，一部手機賺18蚊人仔，真係乜幻想都無，如果用上月盛傳整體估值400億美元融資，小米PE達710倍！

夢想宏大唔係唔好，不過，當整個行業一齊咁大諗頭，真係有啲得人驚。早兩日美國掛牌的奇虎360，斥資近32億元入股酷派（02369），投入大量銀彈，合作擴大低價智能手機「大神」品牌的市佔率，望五年左右可挑戰小米的中國一哥地位。

手機商焗住鬥平價

查實小米咁快冒起，皆因一個平字，在紅米首發，低於一千蚊人仔的智能手機並唔普遍，不過，預期今年內地，四、五百人仔4G手機，會以數以千萬部出貨量流出市場，而手機平台android屬於Google，唔屬於小米，只要手機夠平，用家買乜其實分別唔大。小米、酷派與一眾手機生產商的泥漿摔角，照劇情推展，加埋酷派消息後被掟到散晒，大致可預示，手機市場可能會比早年內地白家電市場割喉減價戰，更為悲壯。

另外，讀者如想知道心水股票最新價位，可以喺android的play store或者iOS的app store下載東網money18手機應用程式，隨時睇到心水股票免費報價服務，或登上東網money18，獲取更多最新最快資訊。至於27958888電話聽上日股價服務，將於十二月三十一日後結束。

古勝