喺依家呢個科技年代，大家除咗出街Shopping之外，有唔少好似絲絲咁嘅「宅女」都會因為貪方便而選擇網上購物。一提到上網買嘢，大家都會即刻諗起出名又平又多嘢買嘅淘寶，但係好多人都會擔心淘到假貨呢個問題。
不過喺聽完以下呢單新聞之後，大家對淘寶嘅信心可能會多番啲。
近日淘寶同內地多個地方嘅警察合作，運用「大數據分析」，成功查出網站入面貨品總值多達2,150萬元人仔嘅售假案。疑犯涉嫌喺淘寶賣假嘅Nike波鞋，而事件入面嘅犯罪集團相信已被搗破。
阿里巴巴嘅知識產權保護專家話，賣假貨嘅商人愈嚟愈狡猾，佢哋會由幕前退到幕後做批發，又會將舖頭搬去國外經營，喺外地發貨，希望可以用各種手段掩人耳目。
不過，由於佢哋每一次嘅交易，都會喺網上留低紀錄，只要透過仔細嘅數據分析，犯人最後都係會露出身影。
阿里巴巴不愧係大公司，咁大規模嘅假冒生意都畀佢查得出。但係無啦啦關注售假問題，唔通馬雲之前真係畀劉東強影射多假貨言論激親？不過，唔理係咩原因，自此之後，淘寶嘅粉絲購物就可以更安心喇！
余絲韻