Market Insight：滙控吸引力浮現

古勝同位中港股市基金經理傾開，都認為今次亞洲經濟受波及機會極微，主要是多國財政狀況遠勝九七年，而且今次火頭由油價暴瀉所引發，而亞洲大部分屬石油淨進口國，尤其中國，低油價反而經濟受惠，壓低通脹，畀人行貨幣政策有更大彈性，未來更加手鬆。

下半年全球最佳表現股市A股，確是狂態畢呈，昨日臨收市一個鐘又再跌變升，滬綜指升39點收報3,061點。董伯話祖國好，香港好，但事實並非如此，至少股市情況就唔係咁發展，近排港股認真嚇死人，單是第四季，勢估唔到先有滬港通，再嚟阿爺減息，個市依然要跌到四腳朝天，返回今年五月時水平。

古勝冇點你2014/12/18

萬里長空

計埋昨日個市已經連插五日，昨跌多84點收報22,585點，即市低位22,529點，穿埋十月初股民以為阿爺「懲罰」香港，唔放滬港通時造出的22,565點低位。

當收息股並唔失禮

今次跌市最肉酸係愈插成交愈大，周一主板686億元易手，周二升至912億元，昨去到1,077億元，睇落恒指似乎跌唔多，國指更係升住收，可是近千一隻股票淌血，加埋成交唔細，可以睇到，近期狂沽增長型股份換入低估值重磅國企，尤其中資金融股的大趨勢，漸漸進入白熱化階段。

昨日三隻重磅內銀，中行（03988）、建行（00939）同工行（01398）貢獻恒指72點，正好畀兩隻瀉極唔止的藍籌濠賭股抵銷。依家純睇指數，實在無乜意義，留意番整體大市股份升跌比例，更能反映到魚缸實況。

好耐無人再提聖誕鐘炒滙控（00005），因為金融海嘯之後，此曲早已不彈。在下今年突然諗起，皆因見到明明面對利率市場化，資產質素踏入轉差周期，基本因素展望麻麻，純綷因內地投資者對中央經濟改革的決心予以肯定，以及貨幣政策轉向，都足以炒到飛起的內銀股，諗吓滙控衰極都至多係炒房無表現，環球營收在去槓桿趨勢持續下，無乜增長，故有冇可能純因為夠平來個人棄我取？

新股又再做潛水員

聯儲局會唔會將聲明裏面「維持一段長時間低息」的字眼刪掉，執筆時未知結果，但睇見近排十年期美債息級級落，由月初公布就業數據時近2.4厘碌到落2.1厘水平，睇埋德、法、意、日同樣有咁情況，已可體會到環球超低息可能已成常態，低通脹下美國未來加息幅度也將有限。

由此角度睇，純當滙控為收息股，其實唔失禮。預估一五年股息率有5.8厘，回報已比滙控現行永續債券5.3厘高出不少，尤其睇番依家市帳率0.95倍左右，比○八年至今平均1.2倍低近21%，借住俄羅斯危機，基金恐慌性避險，拋售跨國金融類股份，在下反而認為滙控已漸漸跌到一個有吸引力的水平。

中廣核電力（01816）的新股神話可一不可再，馬拉殯葬股富貴生命（01438）首日就潛水，收2.1元比招股價3元深潛三成，邊爐股呷哺呷哺（00520）收4.54元，亦比招股價4.7元跌0.16元或3.4%。踏入一五年前，仲有7隻新股排住隊上市，睇見隻富貴生命咁，咪話唔驚。

估唔到第一隻因為盧布插水出盈警的股份，會係心水股之一吉利汽車（00175）。由於出口市場急劇萎縮，俄羅斯業務可能錄得外匯匯兌虧損，公司估全年業績要跌五成，以一三年賺26.6億人仔，即係得番13.3億元人仔。近排唔少大行推介吉汽，奇怪係愈煲愈低，由十一月初3.68元浸浸落，昨消息一出，仲要隊到2.43元，收2.59元仍要跌一成七。

盧布大貶 吉汽當殃

其實撇除一次性的盧布貶值，業績跌兩成一左右，同中期時差唔多，雖然無因為下半年內地自主品牌汽車市佔率升番而收復失地（事實有預測認為集中下半年推新款，推廣及銷售成本相對高，反而不利短期邊際利潤），證明淡市中，任何風吹草動的殺傷力都會倍增。

另外，讀者如想知道心水股票最新價位，可以喺android的play store或者iOS的app store下載東網money18手機應用程式，隨時睇到心水股票免費報價服務，或登上東網money18，獲取更多最新最快資訊。至於27958888電話聽上日股價服務，將於十二月三十一日後結束。

古勝