聯想集團創辦人柳傳志大談創業心得，不忘幽自己一默。佢話，好似阿里巴巴持股嘅交友網陌陌，幫人搵女朋友就可以喺美國上市，佢自己以往點可能想像得到？
柳傳志承認，家陣自己嘅睇法亦改變咗，認為喺今時今日嘅互聯網世紀下，年輕人好似大學生咁，家陣創業只要有膽就可以。不過，作為聯想教父嘅佢對年輕人只有一點囑託：「別把父母的養老金折騰進去。」
由電腦起家，到如今涉獵現代服務、金融服務同現代農業領域，喺柳傳志嚟睇，互聯網時代仍然係短跑，受到衝擊嘅各個行業唔能夠慌亂，邊個能夠跑完呢一圈尚未可知！
柳傳志笑言，全中國有幾十萬個行業，嚟自移動互聯網嘅衝擊或快或慢，但都不可避免。聯想嘅步伐必須跟上，否則一年半載就會出問題。
由於客戶年齡嘅唔同，適應時間亦會唔同。如果所有行業都似「互聯網大咖」所講嘅要立刻轉變，就會帶嚟恐慌。唔同行業應該分不同步驟調整咁話！
余絲韻