市場研究機構eMarketer最新公布嘅統計顯示，以內地互聯網巨頭阿里巴巴同百度為首嘅中國公司今年將佔世界網絡廣告市場1,460億美元收入中近11%。呢兩家公司分別佔咗4.68%同4.66%，排第三同第四位，領先微軟、雅虎、IAC同Twitter。
講到呢度，內地互聯網巨頭乜唔係BAT（百度、阿里同騰訊）咩，點解好似無提到馬化騰嘅騰訊嘅？原來絲絲睇真啲，騰訊排第九，佔總收入0.83%，其實比起舊年嘅0.61%，已經有進步。之不過，今年BAT另外兩位嘅阿里同百度就認真厲害啫。
eMarketer指，報告說明中國公司喺網絡廣告上發展有幾快。喺全球網絡廣告市場，谷歌依然領先，佔據31.1%嘅份額，雖然比去年下降咗零點幾個百分點。Facebook以7.75%的份額排第二，比一三年增加兩個百分點。微軟同雅虎分別佔2.72%同2.36%，排第五同第六，新浪佔0.38%，排第十四位。
喺移動廣告市場，今年嘅市場規模有402億美元，阿里同百度似乎更強勁。阿里市場份額從一三年嘅1.6%大幅增長到6.2%，排第三位。
第四位嘅百度市場份額更增長近一倍達到5.1%。
但係，谷歌亦統治咗移動廣告市場，今年市場份額為40.5%，但低於去年嘅47%。Facebook上升兩個百分點至18.4%。
余絲韻