絲絲講場：羅奇婚姻論：中美無真愛！

佢形容中國同美國維持緊一段唔存在真愛，純粹因利而合嘅婚姻關係。

經濟互補 價值觀差異大

一直以嚟，美國需要入口中國嘅廉價商品，而中國就要靠美國出口商品，去刺激內地生產。

另外，中國鍾意儲錢，美國鍾意使錢，中國又可以不停借錢畀美國。

中美兩國價值觀咁唔同，唔怪之得羅奇話中美雖然結婚30年，但關係極唔穩定。一有問題嗰陣，大家就會責怪對方，佢又嘆：「就好似現實生活中嘅婚姻咁。」總之，中美兩國呢段婚姻係充滿危機同挑戰性嘅。講到咁灰，睇嚟大師對婚姻睇化晒喎。

咁講完中美呢段婚姻後，羅奇大師本身嘅婚姻又點呢？現年69歲嘅羅奇，就只提及自己太太係一位心理學家，相信在場聽眾以至絲絲，都想知多啲！

余絲韻