繼早前搞1蚊機票做噱頭後，創意多多嘅廉航HK Express又搞搞新意思，趁住聖誕節送禮物畀大家，推出5蚊一張單程機票，優惠機票一共有成59,700張，但要出年先可以出發。呢啲手快有手慢冇o架，大家又要搶喇！
自從HK Express轉做廉航年幾以嚟，耐唔耐有平機票推出，對於消費者真係好消息。今次HK Express推出嘅聖誕機票優惠，搶平飛係由十二月十六日起至十二月廿三日晚上十一時五十九分，旅遊日期就要明年一月一日至十月廿四日，有成14個航點可以揀，當然包括東京、首爾等港人熱門旅遊地點喇！
每程機票平到5蚊，粗略計連埋稅同附加費等最平1,000蚊有找，加上依家日圓低到咁，真係去多幾轉日本，荷包都唔會太傷喇。
余絲韻