絲絲講場：蔡炳中雙重忙去搞邊科？

銀通最近出現新面孔，老臣子曾憲求（John）前排退咗休，銀通委任之前喺信貸資料庫環聯做嘅蔡炳中（Angus）做CEO，個Title仲高過之前John嘅副總經理。

據銀通嗰邊解釋，其實之前阿John個位都已經好多嘢做，要同銀行搞好多溝通交流，而依家Angus坐CEO哩個位會更加忙，因為除咗同銀行嗰邊傾之外，仲要處理公司發展方向，同埋搞吓科技研發。

Angus喺金融界打滾三十幾年，星展、花旗、VISA同美國運通呢啲大型金融機構嘅主管級職位全部做過晒，依家除咗管理金融相關嘅嘢，仲需要睇埋科技。

雖然之前嘅工作涉足科技嘅唔多，不過兩年前Angus突然轉入環聯做，就睇得出佢係一個樂於轉換新環境、接受新挑戰嘅人！

Angus有一個目標，就係希望將銀通開發嘅技術轉化為業界同市場嘅指標，協助會員銀行開拓業務嘅同時，最重要係推動本地金融市場發展，睇嚟佢今個聖誕都未必有假放。

余絲韻