絲絲講場：會公選帥今年惡鬥
會計師公會今個禮拜五（12日）就舉行AGM選新會長，以往臨近選舉前都會出現新會長大熱門人選，今年卻出現兩虎相鬥嘅局面，事關兩位現任副會長龔耀輝同何超平今年「旗鼓相當」，真係未到最後一刻都唔知邊個會跑出！
何超平龔耀輝「五五波」
線人同絲絲講，直到依秒鐘，真係未確定邊個會看高一線，只能以「五五波」嚟形容。龔耀輝係天奧共盈集團聯合創辦人，何超平就係普華永道會計師事務所合夥人。
睇牌面，龔耀輝喺會計師公會理事會都服務咗好長時間，贏面好似略高一籌，不過，龔耀輝依家唔喺會計師行做，而且一向形象都係改革派，唔知能唔能夠得到理事會大多數成員支持。至於何超平，優勢當然係有大會計師行做後台。
岳思理AGM後將榮休
不過，何超平能唔能夠坐正，前提係先要過理事選舉一關，要重選理事成功至有資格被推選做會長。至於龔耀輝今年就唔使重選理事。今年會公理事會選舉，有10人角逐7個理事席位。
講開會計師公會，喺理事會年資最長、服務咗理事會長達28年嘅理事岳思理，喺今屆AGM後就會榮休喇。
余絲韻