孖妹Ｓ檔案：又聞聖誕鐘 撇甩滙豐？

監管撳住「搶」合規支出大

市：滙控擁躉兼散戶Blog王 市場先生

Kitty：聽聞你因為滙控（00005）受咗情傷，而且你同佢之間嘅感情已經玩完，到底係咪真o架？

市：實不相瞞，近年有其他股已經取代咗佢喺我心目中嘅地位喇，呢個轉變係舊年年尾開始嘅﹗我用咗7位數字金額建立咗個新價值投資組合，尋覓同我最夾嘅「悶股」，自己親手發掘呢批股份真係好有樂趣。

我喺○一年「九一一」之後買落嘅滙控倉底貨就未沽，大大話話都揸咗十幾年，算長情o架喇。喺參與世紀大供股之後，持股成本價降到64蚊，之前我話過90蚊會減持，可惜唔到價吖，咪揸住收吓息先，股息率都有5.9厘。

彩兒：曾經有一份真摯嘅愛情放喺我面前，但係我無去珍惜，到冇咗嘅時候先去後悔……你唔好步我後塵啊！（拭淚）

市：以前聖誕鐘買滙豐之所以Work，係因為佢喺第二年二月份就會公布全年業績，以前業績多數唔錯，而且末期息又好，如果有增加派息嘅消息都會喺二月公布埋，所以股價咪會升；不過，今時唔同往日啦，國際金融機構嘅生意喺愈來愈多監管條例之下好難做，呢啲條例好多時係想達到政治目的，好似打擊恐怖分子咁，依家嘅罰款係罰以前嘅事，根本冇辦法補救！

再者，國際金融機構為免將來被罰，逼住加Compliance（法規）部門人手，支出根本冇得慳，滙控盈利喺美國加息前難有好表現，上季有增長主因貸款減值撥備減少，所以相信佢股價冇乜上升動力，現價70幾蚊買入只可以寄望收息，「財息兼收」嘅日子已經過去。

隔絕「噪音」寧選悶股

Kitty：你依家最得寵嘅「小三」主要係「二字頭」嘅悶股，到底佢哋有乜咁好吖？

市：新價值投資組合分別有39.4%、6.5%同4.6%資金，放咗喺南洋集團（00212）、建生國際（00224）同埋博富臨置業（00225），雖然佢哋冷門，但係勝在回報保持平穩增長，主因佢哋走勢唔跟大市，較受公司經營狀況影響，同埋以成熟投資者參與居多，唔似得啲指數成分股咁受市場氣氛影響，我想投資時隔絕其他「噪音」，所以先揀佢哋。

南洋集團可以算係悶股中嘅極品，由十年前約7.2元穩步上升至目前49.5元，升值近6倍，集團業務好簡單，主要係投資物業，股東們可以安心長期持有慢慢等增值。另外，建生國際主力收購物業做投資收租，我覺得佢嘅管理層投資眼光掂，近期仲活化旗下工廈建生大廈做寫字樓，租金收入有望提升；博富臨近年財政狀況不斷改善，佢自從一二年扭轉淨借貸嘅局面，之後每年現金流都有增長，相信股息率會Keep住升，而股價都會受資產淨值提升帶動。

博美加息先吼友邦

黃：中原資產管理高級副總裁 黃安盈

彩兒：你咁後生，一睇就知你唔係情迷「大笨象」嗰挺人啦！

黃：我估同滙控（00005）Keep住愛情長跑嘅會有兩大類人，第一類就係好後生就買落貨長揸收息嘅中年人士，另一類就係喺高位買落，被綁死之後揸住唔放嘅投資者，呢個情況唔係同滙控談戀愛啊，分明係孽緣！

如果依家要揀穩定增長嘅大藍籌，滙控一定唔係首選！雖然市場憧憬美國即將加息，預期有利佢利息收入，催旺資金追逐，但係要講「至正」嘅美國加息概念股，就實係友邦保險（01299）啦，除咗利息收入有機會受惠之外，現時佢出力猛攻內地市場，國際品牌有助吸客，支持保單收入健康增長，適合長揸，絕對可以挑戰滙控喺股壇嘅地位。

Kitty：我都想為自己份嫁妝籌謀吓，仲有乜好嘢益我啫。

黃：我不嬲都推介長揸中電（00002）o架，用嚟對沖吓電費增長都好吖！另外，染藍日子尚短嘅領匯（00823）都值得諗，佢近年致力優化旗下商場，有助提高租金議價能力，促進盈收。

如果唔想煩，大可以月供，不過建議將買貨日訂喺月頭，可以幫手儲錢，避免做「月光族」；如果係有睇開市，大可以吼住跌市或者市場出現過度恐慌情況時就入一、兩手。

A股轉牛 首選南方A50

彩兒：滬港通通車後，個個都盯實A股市場喎。

黃：我都覺啊！A股有由熊市轉向牛市嘅訊號，其實如果無留意特定A股，進取啲嘅投資者不妨考慮投資A股ETF（交易所買賣基金），長揸幾年都得，南方A50（02822）算係首選！

滙控回報跑輸幾條街

如果遇到情投意合嘅股票，相信唔少散友都願意愛情長跑，收息之餘，仲可博資產升值。孖妹搵咗6隻股壇「風頭躉」做比較，睇番佢哋過去十年股價連股息再投資的總收益，「獅王」滙控（00005）總收益錄1.54%負回報，面對達108倍正回報嘅「企鵝仔」騰訊（00700），真係跑輸幾條街，亦都大幅跑輸反映大市嘅盈富基金（02800）。

過去五年賺得5.3%

再睇埋過去五年嘅總收益，滙控有5.3%正回報，有國壽（02628）負24.58%嘅劣績墊底，但係都挽回唔到跑輸大市嘅劣勢。

彩兒 & Kitty

若有料報畀彩兒同Kitty或有嘢問，可電郵money.biz@on.cc