Market Insight：東風長汽優先關注

近期焦點，再唔係歐美成熟股市，而係中國股市升到嚇死人，中環飯局見A股基金經理，由幾個月前死死吓，個個都突然變得意氣風發。滬綜指由六月中旬開始級級上，到早兩星期人行意外減息，終於引發井噴式爆升，單是上星期滬綜指累計升幅達9.5%，創六年最大單周漲幅。

上周五，雖一度傳來券商收緊孖展保證金，令滬綜指由升轉跌，但個個認定阿爺托市之心，早已經畫公仔晝到出腸，A股震倉一瞬即逝，滬綜指最後拗腰倒升38點，收2,937點，即市波幅達到165點，用坐過山車都不足以形容波幅之誇。最厲害係兩市成交繼續創新高，周五成交達1.07萬億人民幣，創下全球股市歷史紀錄。

古勝冇點你 2014/12/08

萬里長空

孖展水平夠誇張

截至本周四，內地兩市融資餘額，即係我們所指的新增孖展資金額，升至8,735億元人民幣，等於新入市股民平均每人揹住36萬人民幣孖展額，就算在人均收入較高的香港，都已經係誇張，更遑論是祖國股民！

中國全民皆股，周末睇網媒新聞，仲見內地財金演員建議股民賣樓炒股的報道。一句講晒，A股實在衰咗太耐，滬綜指由6,124點跌落1,664點，股民心諗就算彈番一半，都可以番到去接近3,900點。認識的A股基金經理，更加以○七年內地牛市高峰時滬綜指平均市盈率達6.5倍，同依家的1.6倍相比，認為後市仲係有巨大上升空間。

牛市最癲狂一刻，估值往往可以好唔理性。美國二千年科網股熱，大部分營運模式睇落都無可能產生商業利潤、只花錢不賺錢的網站，單純以瀏覽量「吸睛」數目計算估值。以A股中信証券（600030.SH）為例，二○○七年市帳率試過15.7倍，對比依家2倍左右，只及高峰期的八分之一左右。

尖頂調整機會高

不過公道啲講，股市常態是由超賣到超買，周而復始，牛市出現，往往伴隨經濟放緩，貨幣政策逐漸轉向之初。再者，A股經過近七年時間在二千點水平浮沉，股票估值壓縮，完全蠶食多年的盈利增長，二千點的底部，應是相當穩固。不過到底會升幾多？會唔會一如以往一炒就亂嚟，炒到爆為止？

睇過去兩星期的升勢，中國股市一放就亂、一收就死的慣例，這個劇情重演的機會確存在。起碼減息後第一波升浪，睇住指數9日RSI去到95的超超超買水平，尖頂調整，恐怕只係遲早發生的事。筆者相信○九年四萬億救市後高位3,478點，會有相當大的阻力。

毫無疑問，賭A股狂牛繼續向淡友肆虐，券商、內險及內銀定必繼續是資金追逐首選，不過股民要有心理準備，再有孖展保證金收緊的一類消息，氣氛可以立即被急凍，現水平衝鋒，風險已愈來愈大。

今個星期焦點是中廣核電力（01816）掛牌，因回撥關係，唔少大孖沙分配不足，即使IPO，估計都會因為破紀錄的過百張頭槌飛，令大飛客分配比例極奀。街外吹風的大孖沙叫價話開高三成，會唔會反高潮唔知，但如果開出升幅少於兩成，或者可以諗諗炒一轉短。

銷售數據勝預期

近排汽車股走勢麻麻，皆因幾間大行都唔睇好今年最後兩個月銷售表現，結果油價插水對汽車股的刺激完被抵銷。執筆時中汽協數據未出，不過由CAM數字顯示，十一月乘用車按年升5%，同中汽協的十月年率升2.8%，以及大行持平的預期比較，似乎唔係差得咁緊要，而按年及與十月份比較則有增幅，表現較預期好的包括廣汽（02238）以及長汽（02333）。

上周五見長汽股價明顯突破，抽上40元樓上，破晒位，但在下較睇好另一隻銷售數字比較平淡，微跌1%的東風（00489），近期股價似在10.82元水平做好雙底，二○一四年6.6倍PE，明年進一步回落至6倍左右，儘管銷售基數比較大，但勝在夠平同埋穩陣，如果對金融股有畏高症，佢同長汽都可以作為優先考慮。

古勝