當好多香港人為買唔買一層幾百萬嘅樓煩惱時，小米創辦人雷軍就喺短短五分鐘內決定豪擲一億元人仔投資YOU+國際青年公寓，咁果斷唔係個個有錢人都得o架。
除咗賣手機成為內地一哥外，雷軍今次真正踩過界涉足地產。YOU+嘅商業模式就係租咗成棟樓之後重新改裝，租畀一班啱啱踏入社會工作嘅青年。
雷軍仲要做「有態度嘅公寓」，希望幫單身年輕人，所以有資料話青年公寓有「三不租」：45歲以上嘅唔租、結咗婚嘅唔租、唔鍾意識朋友嘅亦唔租。
YOU+國際青年公寓嘅創始人劉洋仲透露，雷軍見到內地好多年輕人都面臨租樓難題，所以決定幫佢哋一把，而現有喺廣州嘅兩座公寓，月租就介乎2,000至3,000元人仔。
其實雷軍喺年初都已經講過想投資埋房地產，不過認真度過之後都係覺得要專心做手機業務。今次投資YOU+國際公寓都可以話係圓咗雷軍一個夢想，難怪佢諗咗五分鐘就扑錘啦！
余絲韻