可能係專業關係，絲絲自信「認人」有一手。不過，就算係一般人，要認出國際名人邊個打邊個，應該都冇難度啩。點知，外國最新有調查發現，竟然有一成美國成年人，把微軟創辦人蓋茨，同蘋果公司（Apple Inc.）已故創辦人、教主喬布斯攪亂，都咪話唔好笑。
調查係美國皮尤研究中心進行嘅，一共訪問咗1,066個、至少會偶爾使用互聯網或移動設備嘅美國成年人。其中，83%嘅受訪者可以從照片中認出蓋茨（亦即有17%人認唔出蓋茨）。知名度也許較低嘅facebook營運總監桑德伯格，更只有21%人認得。
最神奇嘅係，有10%受訪者把蓋茨錯認成喬布斯。唔通美國人真係太掛住「教主」？
唔單止認人差，受訪者嘅IT知識都好一般。調查發現，只有74%人知道1MB大過1KB；又只有36%人知道第一代iPhone係喺○七年發布嘅。此外，只有唔夠一半嘅受訪者明白，單單因科技公司制訂咗私隱政策，並不代表佢哋會把訊息保密。另只有23%知道「互聯網」同「萬維網」係有分別嘅。
照咁睇，喺依個高科技世代，呢批受訪者可能都要先惡補一吓IT知識喎。
余絲韻