Market Insight：內銀股估值大落後

睇見昨日恒指成分股中，除石油及電訊股比較失色之外，50隻藍籌股有40隻向上，反而整體大市升跌比例無咁一面倒，升跌比例1.28對1，資金集中掃落去重磅股而非二三四五線股，令到昨日大市的突破可信性大大提高，十二月初個市點睇都唔會太差。

石油輸出國組織（OPEC）今日會議，上星期個市傳到似層層話部分成員國傾向減產托價，惟紐約期油由74美元左右，彈到去77.8美元已經無以為繼，隔晚又打回原形，最低撻落73.71美元，創出四年新低。外電報道，四個產油國沙特阿拉伯、委內瑞拉、俄羅斯與墨西哥的會前會談，未就減產達成共識，只同意每季舉行會議評估油價，已經有分析估緊萬一OPEC唔願減產，油價落到60美元的可能性十分大。

古勝冇點你 2014/11/27

萬里長空

紅色飛機仲有得升

事實上，歐洲同埋日本經濟唔掂，需求回落，中國則要改變能源浪費習慣，同污染宣戰，美國的頁岩氣發展迅速坐大，今時今日已經有條件以天然氣代替石油，變身為石油淨輸出國，出口是近三十年最多。種種因素結合下，油市前途都係一片黑暗。

今浪油價大跌，對乍暖還寒的環球經濟復甦，肯定是利多於弊，除可壓抑發達國家的通脹壓力，等各地央行可以更放肆印銀紙水浸資產市場之外；對新興市場（產油大國俄羅斯除外）出口製造業以及物價穩定，同樣有益。古勝估計，低油價浪潮的第一批受惠者依然最值得睇好航空股。三隻紅色飛機股──國航（00753）、南航（01055）以及東航（00670），經過月初整固，近幾日紛紛拗腰現升浪，三隻之中仲係最睇好東航，看官們不妨瞄多兩眼。

上周五人民銀行唔減又減，突然宣布不對稱減息，幾乎稍為有些少財經知識的，第一個反應都會話對高負債股有利，對銀行不利，但事實係咪咁簡單？君可見高負債股的代表中國鋁業（02600），負債比率高達270%，星期一股價彈些少之後，好快已經打回原形；相反，面對存貸息差收窄壓力的內銀股，卻係否極泰來，以工行（01398）為例，連升三日，昨收報5.17元，以收市計創咗超過兩個月新高。

芬佬追貨熱門之選

客觀現實係，大孖沙對於阿爺終於肯由「微刺激」轉做「強刺激」，利用貨幣政策振奮經濟的措施，對內地高處不勝寒的樓市，托市之心是不言而喻，投資者對銀行資產質素，因為樓價下滑而加速轉壞的疑慮，暫時得到撫平。再者，今次減息可算是出乎九成分析員預期之內。

事實上，估明年初中國才進入減息周期的，是主流想法，諗住睇定先的基金經理，在年底前現金水平偏高的情況下，無辦法唔急急追貨，好向客戶交代，有足夠流通量又可以迅速滿倉的，除了內銀股，實無他選。

最重要是，其實溫爺爺早兩年已經提過，內地銀行是暴利行業，未來利率市場化及引入競爭，銀行賺錢快過打針的日子唔會持久，這趨勢在內銀過去兩年業績保持增幅，股價卻只能浮浮沉沉，反映得八八九九。

息差收窄料設底線

睇番工行、建行（00939）、中行（03988）及農行（01288）四大國有銀行，一五年預期市盈率分別係4.9倍、4.7倍、4.8倍及4.6倍，連大摩環球銀行股指數平均市盈率11.2倍一半都無，所以就算幾隻內銀股出年真係因為阿爺整頓銀行業，利率市場化繼續不對稱地減息，存款息率減得多過貸款息率，最壞情況，是業績從高峰期慢慢跌番兩至三成，內銀股估值都仲未有耐同國際銀行看齊。

況且，依家內地銀行面對網絡金融競爭，出現存款流失情況，不良貸款周期亦係啱啱見底回升，人行會唔會睇住佢哋死，搞到息差收窄到一眾銀行頂唔順？值得反思。在超低估值下，短期息差收窄壞消息又已經見光，到底炒內銀股，抑或追本身經營得麻麻、單靠一個減息慳到錢的重債股，不妨好好諗吓。

古勝