Twitter財務總監諾托（Anthony Noto）前日發咗個Tweet，話要收購一間公司，想下個月十五或十六日扑錘，揚言有晒計劃，即時惹起市場關注，不過無幾耐佢就急忙剷晒扮若無其事，點知依家欲蓋彌彰。
Twitter發言人隨後出嚟撲火，話諾托原來想PM（發私人訊息畀）某人，之後就拒絕評論，所以外界估唔到佢講緊邊間公司、搵邊個，亦唔知係佢本人定Twitter想收購。
其實諾托唔似係個大意嘅人，佢七月加盟Twitter前係高盛科技、媒體及電訊投行董事，Twitter上市正係佢嘅代表作。
雖然効力Twitter只係短短四個月，但早喺○九年做全國美式足球聯盟（NFL）財務總監時已經有玩，係當時少數有Twitter嘅賓架之一，堪稱忠實用戶，所以外界估佢應該係Twitter私人訊息功能經常失靈嘅最新受害者。
Twitter都知衰，月初就向投資者拍心口話，增強私人訊息功能係產品研發部門嘅頭號目標之一。嗱，依家連財務總監都「中招」，無得再拖啦！
余絲韻