孖妹Ｓ檔案：互通下一站 深入分析

偷步炒深圳AH股差價

黎：時富金融優越投資服務部顧問 黎永良

彩兒：滬港通畀人話係幽靈列車，你點知小加「再建的橋」唔會係奈何橋？

黎：滬港通成交遠遜於投資者預期，令相關概念股沽壓不斷，市場原本以為AH差價股實會炒上，大家當然唔Happy啦，連深港通概念股都畀人沽埋一份添！

不過，相關股份呈超賣，相信等大市喘定、滬港通概念股回穩後，深港通概念股走勢就會好轉。

明年上半年料出台

彩兒：咁深港通概念股又應該用乜策略炒？

黎：我估計深港通出年第一至二季好大機會出台，所以最近已經有部分聰明先鋒者慢慢吸納緊較深圳A股有大幅度折讓嘅H股。其實醒目而風險承受能力又較高嘅散戶，不妨趁機小注低吸，博喺消息公布後謀取賺到笑嘅回報，不過就要有短期走勢未必好、而且需要中線持有嘅心理準備喇。

世寶墨龍值得留意

Kitty：我好Cool喎，要賺到笑唔係咁易囉，點揀值博嘅股份先？

黎：深港同步上市嘅AH股有17隻，目前最高差價嘅H股都有七成折讓。我建議散戶揀股時，要選擇高折讓、業務受國策支持、有概念、管治健康，最好盈利唔錯嘅股份，其中折讓較高嘅股份，好似浙江世寶（01057）、山東墨龍（00568），同埋山東新華製藥（00719）等都值得留意！

舉例說，山東墨龍有頁岩氣概念撐住，受惠中央加快頁岩氣開發；另外，山東新華製藥主力喺內地製造成藥，隨住內地醫改，篩走製造冒牌藥同假藥嘅企業，做研發嘅公司有阿爺扶持自然有着數啦！

Kitty：除咗AH差價股，仲有乜股份會最先直接受惠深港通？

黎：香港上市嘅內地券商股其實都可以吼，我認為最好揀行業龍頭，好似中信証券（06030）、海通證券（06837），仲有國泰君安（01788）等等，不過就可以等遲一步、深港通有聲氣先部署。

兩地營業券商股可買

張：國元証券（香港）策略研究員 張浩涵

Kitty：你咁熟內地魚缸動態，以你估計有乜深A股份係被納入深股通投資範圍嘅大熱？

張：我預計深證100R指數、深證300指數嘅成分股，同埋「A+H股」嘅深A股會係被納入深港通初期可投資範圍嘅大熱，但係所有以人民幣以外貨幣報價嘅深股，仲有被實施風險警示嘅深股都暫時唔會被納入。

Kitty：我有靚女散戶朋友想部署定啲相關深A股先，不如你為佢哋指點迷津吖。

張：僅就深港通驅動嘅事件性投資嚟講，我建議較穩健嘅香港投資者，喺深港通開通前重點關注券商股，好似喺深港兩地都有經營業務嘅國元証券（000728.SZ）及廣發證券（000776.SZ）等，貪佢受益明確。可承受高風險嘅散戶可留意吉林敖東（000623.SZ），公司製藥業務一四至一五年盈利有望持續增長，而新項目有望迅速推動公司高增長收入，加上佢持有廣發證券21%股權，間接受惠於深港通。

彩兒：深港兩地股友嘅炒股文化有乜唔同？

張：兩地投資者無論對風險睇法，或投資行為都係差天共地。簡單嚟講，面對公司開拓新項目帶嚟嘅不確定性，深市散戶表現明顯風險喜好，佢哋經常對風險給予溢價，所以喺深圳市場，小型公司雖然抵禦系統性風險嘅能力較低，但投資者就畀呢類公司相對大公司更高嘅估值，同香港市場投資者相反。香港投資者一定要認清呢一點，以免「水土不服」。

研究散戶心理 勿跟風

彩兒：香港股友研究深A股嗰陣可以點做功課？

張：首先對目標公司基本面一定要深入了解，其次係唔單止要將目標公司估值同香港市場做比較，仲一定要同深圳市場同業做比較，第三係要研究深圳市場散戶心理同行為，例如普遍嘅市場跟風現象咁。另外，喺操作上要保持定力，唔好盲目沽空。

如果想攞上市公司資料做功課，內地市場會相對香港方便，因為A股係被過度研究嘅市場，投資者可以瀏覽上市公司網站獲得財務報表等文件，都可以通過財經網站下載券商嘅免費研究報告，當然深交所官網都係必上網站啦！

深港通知識 散戶知多少？

問題1：喺第一拖拉機（00038）、上海電氣（02727），仲有萬科企業（02202）入面，邊隻先係深港上市嘅AH股？

散戶Thomas答：一拖同埋上氣係滬港通概念股，已經一定唔係啦，而萬科就係喺深圳起家，實係佢啦﹗

答案：第一拖拉機同上海電氣都係滬股，而萬科深股編號係000002.SZ，係深港AH股之中少數H股有溢價嘅股份。

問題2：喺中興通訊（00763）、浙江世寶（01057），同埋比亞迪股份（01211）入面，邊隻先係折讓最大嘅深港AH股？

散戶Connie答：我估係浙江世寶，因為最近財經新聞提得比較多。

答案：上述股份H股分別較A股折讓3%、72%同16%，所以Connie估中喇！

問題3：浙江世寶（01057）從事乜嘢業務？

散戶Cecilia答：哎啊，我唔知啊，應該係同汽車有關嘅，係咪物流運輸？

答案：Cecilia個答案爭少少啊，浙江世寶係主力研究同開發汽車動力轉向系統。

彩兒、Kitty

若有料報畀彩兒同Kitty或有嘢問，可電郵money.biz@on.cc