會計師公會每年舉行嘅「最佳企業管治資料披露大獎」昨日揭盅，今次出乎意料係只有恒指藍籌組別嘅中電（00002）攞到最勁嘅鑽石獎，佢哋已經連續12年冧莊，其他4組全部都無鑽石獎攞。
查實鑽石獎一向唔易攞，去年便只得中電及英國保誠（00002）得獎喳。
咁係咪今年評審門檻高咗？會長兼評審團主席陳錦榮就話，過去公會都唔一定年年頒出最高榮譽嘅鑽石獎，一切都按準則辦事。佢發現，多數公營企業喺公布董事會遴選同董事會組成嘅均衡度，都有空間可做得更好。
隨住滬港通正式開通，佢相信長遠會對企業嘅年報披露，同內部管治都有一定影響。陳錦榮話，因為中港兩地股市嘅交易習慣唔多同，例如係升、跌停板機制等等，會唔方便投資者，所以企業要加強對內部管治嘅要求。
佢樂見依家已經有部分企業開始整合年報披露嘅內容，若果企業嘅資料披露完善咗，可能吸引更多人投資。另外，佢話唔排除未來喺呢個評審上面，會包埋A股公司。
余絲韻