「債券大王」格羅斯早前突然告別太平洋投資管理（Pimco）搞到滿城風雨，最慘嘅係佢離巢後雖然觸發總回報基金九至十月份流失逾500億美元，但同期只得不足1%、即4.3億美元流入格羅斯喺新東家駿利資產管理嘅基金。不過，就喺大家以為債王魅力不再，另一投資名宿索羅斯卻雪中送炭，揼本5億美元（約39億港元）畀格羅斯揸莊。
索羅斯基金管理旗下私人投資工具Quantum Partners向格羅斯管理嘅獨立帳戶打本5億美元，投資策略會跟足債王現時打骰嘅全球無限制債券基金，後者嘅資產規模4.43億美元，即係話索羅斯一出手仲大過債王現時管理嘅基金規模，好明顯係對格羅斯投下信心一票；反觀呢筆資金，只相當於索羅斯基金（規模近280億美元）約2%。
有消息話，雖然格羅斯同索羅斯關係唔算密切，但早於格羅斯仲未完全喺新東家安頓好，索羅斯基金管理投資總監貝桑就探路，最終促成合作。格羅斯就透過Twitter表示，榮幸獲選中為索羅斯管理資金，會同佢嘅團隊以每日二十四小時管理新帳戶。
講番格羅斯嘅表現，佢之前管理嘅Pimco總回報基金後期表現認真麻麻，仲連月遭投資者贖回。但自十月六日起掌舵嘅駿利全球無限制債券基金，截至本周三止取得0.083%回報，就跑贏基準指標嘅0.03%。索羅斯係咪真係咁有眼光，就要放長雙眼睇喇！
余絲韻