私人銀行客戶大把水，不過永隆私人銀行及財富管理部主管譚劍偉（Joseph）就同絲絲分享，私銀本地客好精打細算，每人有成三至五個唔同銀行戶口，方便經常格價。
佢回想起一個大客嘅金句，「請你食飯就無所謂，但畀多咗就唔抵」，呢位太太個戶口有成三、四千萬美元流動資產，但有日知道要畀200蚊美元做查冊，就同Joseph研究咗好耐究竟呢200蚊係咪一定要使，仲話「飯我請你食，但（查冊費）一定要Waive」。
Joseph話，佢哋私銀有七成內地客，而內地客對價格冇咁敏感，通常得一至兩個銀行戶口，好少四出格價，生意相對好做。
永隆私銀開張三個月，部門人數約90人，Joseph話開戶人數符合預期，資產管理規模更加勝過預期，依家六至七成私銀客係由永隆零售銀行或者母公司招行（03968）轉介，其餘新客就以港人為主。
私銀生意帶動銀行財富管理同私銀嘅總資產管理規模至今按年增加近四成，而佢未來會主力發展信託業務。
余絲韻