絲絲講場：馬雲暗寸京東無錢賺
喺內地浙江省烏鎮召開嘅中國首個「世界互聯網大會」，有多個內地科網企業巨頭聚首一堂，但現場嘅火藥味似乎都幾重吓，就連身在香港嘅絲絲都感受得到。
回敬劉強東假貨言論
繼早前京東商城創辦人劉強東建議小微商戶徵稅打假，間接寸阿里旗下嘅淘寶多假貨。
呢日阿里主席馬雲就出口反擊，回絕一句：「話淘寶多假貨嘅人基本無喺度買過嘢」，暗指劉強東根本唔知咁多嘢，咪喺度亂講。一番唇槍舌劍真係好火爆。
唔止咁呀！之前馬雲仲講過，阿里巴巴要成為電商嘅其中一個目標，就係要培養更多嘅京東，而且令佢哋賺錢。唔知馬雲係咪針對緊京東最新財務報表持續虧損情況，語帶揶揄？呢一招真係好狠呀！
除咗內地兩大電商巨頭馬雲同劉強東鬥得面紅耳赤，小米同蘋果公司兩大智能手機商都不遑多讓。
同場加演「小米鬥Apple」
唔知係咪小米賣得好到連董事長雷軍都飄飄然，佢超大口氣咁喺大會上話，小米會喺五至十年成為世界第一嘅智能手機生產商。嘩！場內嘅蘋果公司高級副總裁塞維爾即刻反擊、「講就易，做起上嚟邊有咁簡單？」
咁大盆冷水潑埋嚟，雷軍隨即反駁、「三年前夠冇人信小米會做到世界第三啦！」
余絲韻