Market Insight：頁岩氣股短線炒作

唔少內地有銀士，一早已有投資港股門路。之不過，在下都只係估中一半，事關原來滬股通都叻唔得去邊，第一日130億元人仔額度用盡，之後三日愈玩愈縮，額度使用率分別得37.3%、20.1%及17.6%。

事實過去幾日，除了希望染指中國股票的跨市場基金，有些少興趣經滬港通「濕平」外，主要額度使用者，據知都係一些本身唔夠QFII配額的指數基金，以前要同投行借quota畀3至4厘年息，依家自己股票自己買，不過四日過去，這類套戥活動做得七七八八，滬股通氣氛亦都同近日天氣一樣，急速降溫。

古勝冇點你2014/11/21

萬里長空

A股缺乏入市誘因

不得不承認，以指數表現預測滬港通反應，仲有一個盲點，就係兩市之間雖的確開拓了新的交易渠道，可是刺激基金入市買中資股的誘因卻仍未存在。

好似A股，今日市盈率從高位跌咗八成七，盈利增長被估值壓縮所抵銷，君可見，盈利能力最強、佔指數高權重的金融股，得4至5倍PE都是無人問津。宏觀睇，中國經濟結構轉型、GDP增長放緩、政策對企業盈利的不明朗影響下，中資股實在欠缺炒作故事配合，基金在他們身上加上的風險溢價，也愈來愈高。

昨日早市港股谷過一浸，主要有基金見星期三國務院常務會議，提出十點協助降低企業借貸成本的建議，惹來人行轉向寬鬆貨幣政策的憧憬。講到底，中國通脹去到五年新低，減息或者減存備率的條件經已存在，不過阿爺就係唔想行番○九年舊路，堅持小幅定點的調整，幾時至肯減大手減息或者減存備率，確認貨幣政策轉向，到時才是A股鑊氣再現、滬港通有救之時。

講到滬港通反高潮，不能不提港交所（00388），由周一高位189元，隊到落尋日165.8元收市，高位計唔見咗23.2元。

滬港通曝光前，港交所股價在130元樓下，七月在150元左右橫行，如果港股成交落番去六字頭，實在無乜理由唔落番150元附近。幾個月以來，分析員對滬港通形勢的錯估，可以預見短期盈利預測的修訂將會陸續有來。

港交所趁反彈減磅

若再比對外圍幾個上市交易所的預測市盈率，澳洲交易所17.3倍，新加坡交易所22.9倍，處於大牛市的美國CBOE及CME分別26.2倍及25.3倍。睇番港交所，大行之前估藉滬港通之助，一五年可賺66.7億元，比一四年增31%，但PE都要講緊28.1倍，可以想像滬港通唔掂，就算股價已經連隊四日，睇落去仲係唔值。如果有反彈，減磅為宜。

在油價不斷走低之下，全球頁岩氣開採步伐亦受到影響，而內地兩批頁岩氣探礦權批出後，亦遇到不少困難。現時大部分所謂「頁岩氣概念股」，其實都只係做緊石油相關管道服務等企業，今年經營環境不利，業績與增長預期遜色，估值下調直接拖低股價表現。安東油服（03337）可以話係典型例子，股價由52周高位6.2元，回落至昨日創52周低位1.39元。

咁啱尋日傳來國務院發表行動計劃，要求重點實施節約能源四大戰略，當中特別提及加強頁岩氣地質調整研究，加快技術研發和應用，探索先進適用頁岩氣勘探開發技術模式和商業模式，培育自主創新和裝備製造能力。

宏華走勢弱過藥煲

消息觸發炒作資金短線抄底相關股份，見到安東尋日即市彈上最高1.7元；山東墨龍（00568）、華油能源（01251）、中海油服（02883）均高收。不過，宏華集團（00196）依然係斯人獨憔悴，唔跟升仲要急跌，低位見1.16元，收報1.19元，跌幅17%，原因係公司發盈警，更有大行將其目標價由2.7元大幅削至1.6元。近呢兩年，即使係頁岩氣股有鑊氣的時候，宏華的股價表現都相對落後，如今板塊氣氛陰晴不定，宏華更係弱勢之中的弱勢股，即使行業政策有咩新消息，似乎都唔關佢事！

古勝