李寧（02331）進行咗兩年多嘅改革尚未成功，但私募基金TPG派出、擔當李寧改革「靈魂人物」嘅金珍君，上周五就突然退任李寧CEO一職，淨係留任執行副主席兼執董，搞到「體操王子」李寧依家要獨撐大局，直至新CEO上場為止，頂上做埋CEO兼任執行主席，王子今次名副其實親自掛帥重掌公司。
近年公司管理層不斷洗牌，由董事、CFO、CEO到公司秘書早已人面全非。雖然今次呢個人事調動，主要為促進平穩過渡到新CEO，之但係新CEO幾時到任都未知。前CEO張志勇喺一二年七月退任，到今年三月金珍君任代理CEO，市場一直期待新CEO出場。
家陣改革途中，突然又易帥，市場都擔心TPG係咪想縮沙？不過TPG喺一二年二月向李寧公司認購7.5億元人民幣嘅可換股債（CB），一七年初先到期，經調整兌換價4.5元，仲高過李寧尋日收市價4.08元，所以TPG短期忍痛淡出可能好微。
余絲韻