絲絲講場：飛達帽后氹阿仔入廠
飛達「帽后」顏寶鈴（顏太，兩公婆都姓顏）同好多慈母一樣，一提到阿仔就心甜。
而阿仔亦都好識氹阿媽，之前就用底價5,000蚊，投咗個「Mainland」車牌畀佢，呢個車牌名好有意思，因為同公司英文名一樣。
長駐孟加拉 少見家人
顏太話自己50幾歲，雖然對工作仲有激情，不過去咗孟加拉發展之後，愈來愈忙少見屋企人，依家一個月都唔夠三分之一時間留喺香港，見阿仔時間少，有時都特登留多日只係想同屋企人食餐飯。
佢開到口話好想叫做緊投行嘅阿仔入公司，唔通係為咗接班鋪路？顏太話阿仔做緊投行，想叫佢去公司幫手。「做廠同計數唔同，唔係一加一咁簡單，做廠要浸o架！」
咁即係想阿仔快啲轉行儲吓經驗？不過，顏太話大前提係佢要有興趣做，而且依家啲Partner都好幫到手，所以唔會逼佢嘅。
同老公角色一軟一硬
顏太話兩公婆都好中意嗰度，「佢（顏生）好中意跟我去孟加拉o架，次次都要帶啲康樂設施去，又見吓啲同事，十足福利官」，顏生見到共事廿年同事傾吓偈就好開心。
顏太去到孟加拉就Push員工做嘢，顏生就去氹同事，實行一軟一硬。
余絲韻