Market Insight：房託基金高息吸引

如果話兩市互聯互通的政策，對港股刺激大，媲美○七年港股直通車，實在是說不過去。

睇番當年，中國投資市場火熱，熱錢無出路，阿爺研究畀內地市民直接投資港股，一來疏導熱錢，減低內地通脹及樓市炒賣壓力，可惜消息一曝光，港股炒得仲癲，由萬九點狂炒去到三萬二點，結果搞到港股直通車被叫停。

古勝冇點你 2014/11/13

萬里長空

對比今日，中國經濟堅持放棄粗放型發展，用銀紙堆砌出GDP陋習，明年GDP跌近7%甚至更低可能性愈來愈大。祖國一方面唔想走放水回頭路，另一方面又想托住內地股市，解決經歷七年的漫長跌市，資本市場投資氣氛一池死水的現實，惟有藉滬港通來個南水北調，但用直通車同滬港通比，真係不可同日而語。由四月至今，A股跑贏港股幾條街可見一二。

A股未係散戶杯茶

古勝貪吓新鮮，下周已經決定坐坐「滬港通號」，體驗一下交易流程。相信在下同大部分散戶一樣，要搵A股做主戰場，恐怕難啲，始終隔山買牛，再者，A股監管及資訊披露都同香港仲有距離，估計初期最有興趣經滬港通追A股的，仲係一班QFII基金，可以藉此回撥部分QFII配額出嚟，等將來A股ETF需求增加（估計滬港通開車後，大摩MSCI唔使幾耐會加入更多A股元素吸引更多指數基金進場），可以做多啲生意。

阿里巴巴主帥馬雲確係厲害，○九年藉「雙11」光棍節網購優惠，今日經已成為單日交易數以百億計的全球網購活動，阿里巴巴喺光棍節期間，網店交易金額達571億元人仔，比去年的350億元人仔大升63%，超過傳聞阿里定下的500億元人仔目標，亦勁過晒電子商貿發迹地──美國感恩同聖誕兩大節日網購的總和。不過，連升六日老早被偷步炒起的阿里，在好消息下隔晚在紐交所跌3.8%收報114.54美元。

騰訊短線要追落後

另一中國電商京東（JD）也跌1.6%收場，報25.81美元，反而近排聞風未動的騰訊控股（00700），昨日炒落後升1.2%，收129.2元，計番市值1,532億美元，大約係阿里2,847億美元的五成四。當科網股玩家焦點轉移返到騰訊，估計破134元高位是指日可待。

兩隻心水REITs先後腳派成績表，置富產業信託（00778）首三季收益12.3億元，按年升33%，可分派收益5.84億元按年升26.8%，單計第三季度可分派收益1.93億元。首三季基金單位分派31.18仙，相信達到大行估計全年派41.6仙應該問題唔大，現價預期派息率5.66厘（明年5.93厘）。近日十年期美債息回到2.34厘水平，息差維持超過3厘，現價對於需要長期固定收入的投資者，仲係有相當吸引力。

剛被選入藍籌的領匯（00823），半年收益升9.6%至38.3億元，物業收入淨額升10.6%至27.83億元，連同投資物業套現，作出酌情分派5.56仙，中期每基金單位分派為89.56仙，減番後同高盛中期派84仙的預測接近。在收購現崇山商場的財務影響下，保守估計全年每單位分派1.8元，現價派息率等於3.83厘，稍低於○七年以來平均的4.37厘。

領匯有貨唔怕揸住

在下以前真係有啲怕被揀入恒指的股票，話就指數基金衝一浸，短期可以推一推個價，不過，隨即走樣的紀錄真係唔少，遠有數碼通（00315）、思捷環球（00330），而近三年的昆侖能源（00135）及蒙牛（02319），都係被欽點之後就走晒樣。

原因無他，恒指服務公司揀蟀條件係市值、行業代表性及財政狀況，講到底係要足夠認受性，市值有番咁上下，咁好自然會搵到一些行業周期行到高峰或者過咗高峰的公司入去，好彩今次揀收租佬領匯，勝在行業周期並唔明顯，唔會大上大落。近排歐日央行狂印銀紙加大量寬，中和美國退市息口預期向上對REITs不良影響。不過，領匯已貼近47元，短期似乎到咗價，有貨唔怕揸住，未入市不如等等，45元樓下至諗。

古勝