絲絲講場：富佑主席夢想打敗馬雲
正所謂「人無夢想同條鹹魚有咩分別」，啱啱改咗名做中國富佑嘅中國包裝（00572），新主席陳懷德話睇中手機網絡銷售呢項業務，仲豪言話五年內打敗阿里老闆馬雲。咁有大志，原來係易經大師贈咗佢呢幾句。
陳懷德本身係做直銷生意，佢話私人嘅公司富佑舊年盈利有30億人仔。未來唔排除將資產慢慢注入上市公司，暫時會向富佑1,000萬個會員Sell吓個新平台，所以睇好新業務發展。
「馬化騰當年幫我打工」
陳總自爆同馬雲及騰訊（00700）創辦人馬化騰兩位科技奇葩特別有緣，而且好熟，到依家人哋飛黃騰達都仲有聯絡。佢向馬雲下戰書，夢想係未來五年內打敗馬雲咁話，佢覺得依家最能夠打敗電商業務就係手機營銷，因為手機比較方便。
佢又話，馬化騰當年都係幫佢打工做買手咋！咁會唔會叫啲Friends入股？陳總就話，「乜都可以想像。」好玄喎。
佢咁雄心壯志，唔知坐喺隔籬嘅CEO蕭潤發有冇壓力？
余絲韻