孖妹Ｓ檔案：專家教路 悶股生金蛋

資產折讓率高有着數

Kitty： 你點定義悶股？佢哋同落後股有咩分別？

　市： 悶股係啲較少人留意嘅「冷門股」，每日成交只得10幾20萬，甚至係零成交，所以股價變幅唔跟大市，亦好少入「十大升幅榜」。相反，落後股就比較多人講、多人知，可能只係行業暫時出現咗啲問題，令股價跟唔上大市。

盈富基金vs悶股表現比較

網友對揀悶股的心得交流

彩兒： 啲公用股都好悶，波幅細、成交少，但佢哋咁出名，應該唔係你心目中嘅悶股啦。到底「悶股情人」要點揀？

　市： 我喺Blog度分享過唔少悶股，好似川河集團（00281）、TAI CHEUNG HOLD（00088）、香港小輪（集團）（00050），仲有今年初提及嘅中華汽車（00026、又稱「中巴」）。我揀悶股時，會留意股價較資產淨值折讓率、股息率及派息紀錄、公司財政狀況，以及公司所擁有嘅具價值資產。以我嘅悶股組合為例，最高折讓嗰隻超過70%，其餘平均都有60%。

以中巴為例，公司一四年財務報表顯示每股資產淨值高達160.9元，扣除負債後嘅每股淨現金有41.74元。以我嘅持股成本62元計，資產折讓高達61.5%，淨現金佔股價亦高達67.3%，股息率就唔算高，但都有4至5%，所以我認為佢估值被嚴重低估。中巴目前佔我整個投資組合比例約15%。

Kitty： 你投資組合嘅14隻股入面，有10隻都係呢類悶股，悶股真係咁吸引，令你幾乎願意「為棵樹放棄整個森林」？

　市： 買悶股，個市升到合合時無你份，但個市跌到心慌慌時你又唔使驚。其實我以前主力買金融股，但○八年金融海嘯後，整個行業已經唔同晒，市場對大型銀行管制多多，淨係罰款都相等於企業嘅大部分盈利。

中巴一個月升48%

彩兒： 中巴過去三年大部分時間徘徊喺60至70元水平，但原來喺今年九月二十五日公布全年業績後就持續逆市上升，到依家已經升咗48.8%，果然係「禾稈冚珍珠」！不如再向各位姊妹推介吓其他悶股啦！

　市： 悶股係要靠自己認真地去發掘，亦唔係個個啱玩，只適合長線投資及資金充裕者，因為悶股難買難賣，而且要等幾耐先升無人知，所以每次買入前我都預咗，即使隻股10年無動靜我都願意揸，咁先會買。仲有，一定要揀有息派嘅悶股，咁先有理由令你去守咁耐，唔一定要8至10厘咁高，有3至4厘已經唔錯。

吼業務穩定現金流勁

彩兒： 股友買股通常都想低買高賣，點解你反而鍾情啲股價呆滯嘅悶股？

　止： 對我嚟講，悶股亦等於啲公司動作唔多嘅股份。一間公司上市後可以有好多動作，例如供股集資、發債、收購、合併、分拆……呢啲消息會影響股價大上大落，但作為投資者，如果我唔理解動作背後意義，而且間公司又有咁多Uncertainties（不確定性），咁我就唔會買。我要完全明白間公司搞緊乜，先會買得Comfortable（放心）。

Kitty： 咁不如同大家分享吓，有邊隻股份令你咁放心吖。

　止：由去年開始持有嘅金利來（00533），都算係我投資組合入面最悶嘅一隻。公司主要從事服裝服飾銷售，咁多年嚟，主業都佔收入來源八至九成。業務係就係無乜驚喜，但簡單易明、發展穩定，公司又有強勁現金流，而且股息率都唔低。另外，金利來一直有投資物業收租，近年仲開始喺內地投地，做吓發展商。其實公司喺內地發展物業都有經驗，相信咁做可能係多年來累積現金嘅一條出路，但重點係佢無因此而增加財政壓力，到今時今日都仲係「零負債」，簡直係穩陣到離晒譜。

「未諗贏 先諗輸」

彩兒： 你嘅投資組合有10隻股份，當中有3隻悶股，但投資佔比就超過四成，你果然係「悶友」一名！

　止： 雖然我性格本身都比較文靜及有耐性，但買悶股其實同個人投資取態有更大關係。我認為投資係用嚟實踐「財務自由」嘅途徑，而唔係抱住一種賭博嘅心態，所以我成日都提醒自己：寧願悶悶哋喺股市賺錢，而唔係好精彩咁輸錢。

Kitty： 「股神爺爺」巴菲特咁多年嚟都長揸可樂（KO）、寶潔（PG）、Wal-Mart（WMT）呢啲悶股，佢買股前，會先假想翌日、甚至未來五年嘅股市停開，呢啲心水股係咪會企得住。作為佢嘅「擁躉」，你同悶股拍拖前又會諗啲乜？

　止： 我每次都「未諗贏，先諗輸」，想像隻股喺我買入後即時下跌，甚至連累自己變成「負資產」，如果咁都無所謂，我先會買。

彩兒： 你呢種態度的確可取！各位姊妹都要記住，投資總有風險。雖然悶股股價長期橫行，但唔代表佢哋百分百抗跌，正如以上提及過嘅股份，喺海嘯年嘅跌幅都介乎三至六成，部分亦跌得多過大市添！

彩兒 Kitty

若有料報畀彩兒同Kitty或有嘢問，可電郵money.biz@on.cc