內地市場呢兩日盛傳，因為融創中國（01918）收購綠城中國（03900）單刁遲遲未批，綠城主席宋衞平決定反口話唔賣，仲已經同融創老闆孫宏斌表明咗意向。傳聞雖言之鑿鑿，但尋日兩間公司回應香港媒體時，一間回應話「對傳聞不知情」，另一間卻無直接否認，令人有疑幻疑真嘅感覺。
一個名為中國地產嘅官方微博，前兩日率先傳出話宋衞平重返綠城大局已定，佢已經由東方資產管理公司得到一筆融資，諗住恢復原有股權，仲喺今個禮拜一晚向孫宏斌攤牌，但應承會畀孫宏斌一個下台階。
跟住有內地財經網站引述獨家消息話，因為孫宏斌掌控綠城後產品質量下降，宋衞平唔可以接受，加上宋衞平所創立嘅藍城，有傳發展冇想像咁順利，所以宋衞平肯加碼80億元人民幣重新收番綠城。
雖然故事情節充滿戲劇性，但係當中有唔少疑點，事關業界有傳，宋衞平一個禮拜前以藍城董事長身份出席公開場合時，仲講過「賣綠城並唔後悔，做咗就做咗」，咁快就轉軚嘅可能性似乎唔高。
不過，尋日香港媒體向呢兩間公司查詢，綠城就話對於事件不知情，融創卻沒有直接否認，令外界一時搞唔清傳聞嘅真偽。
余絲韻