今年唔覺唔覺又到尾聲，一班打工仔最期待嘅肯定唔係聖誕，而係派花紅。有全球金融招聘網站最近做咗個調查，發現香港金融專才對獲派花紅嘅信心超過英美，冠絕全球。
金融服務業求職網站eFinancialCareers喺過去兩個月做咗個「全球花紅展望調查」，訪問逾2,000位來自香港、新加坡、美國及英國4個地方嘅金融界人士。
調查發現，有78%嘅香港金融專才預期今年會有花紅收，雖然數字低過舊年嘅83%，但都高過得71%嘅新加坡同英國，就連經濟復甦勢頭最好嘅美國都只係得76%。有43%嘅香港受訪者仲展望花紅會多過上年，真係信心爆棚。
該網站全球銷售及營銷總監George McFerran指，香港專才對花紅嘅期望其實一直都比其他地區高，今年亦都唔例外，不過對比上年，專才對今年花紅嘅期望已經變得比較現實。
絲絲就覺得，降低對花紅嘅期望都係應該嘅，皆因睇真啲份報告，原來近7成香港受訪者都話今年已經加咗底薪，真係恨死絲絲喇。
余絲韻