孖妹Ｓ檔案：夜期補習班 迎戰加時賽
夜期下星期一起就會加時45分鐘，到十一點九先收市，散戶又多咗賺錢機會喇！不過期指向來風險極高，而且仲係零和遊戲，即係有人贏錢就意味有人輸錢，其實十個散戶十一個都想贏，究竟點先可以做贏嗰個呢？孖妹特意搵咗業界同散戶專家教路，勢要向臨瞓前搵外快、發甜夢嘅偉大目標進發！
善用夜期炒外圍
Kitty：炒夜期就要犧牲瞓美容覺嘅時間，依家仲要加時45分鐘，你真係覺得值？
郭：夜期可保日期嘅不足，配合外圍走勢變化，對我有好大幫助。我每晚上完堂，喺大約夜晚十點三就會即刻觀察夜期，睇吓日間做落嘅倉位需唔需要補救，如果有200至300點利潤就會平部分倉鎖定利潤。舉個例，近期外圍慣性跌得甘，拖累夜期出現低水，不過通常恒指第二日開市又會開返高，所以我近期投資期指嘅策略係做定淡倉底先，喺夜期趁低水揸返貨平倉，等第二日恒指開市就趁高開沽貨。
擘價大 難炒「超短線」
彩兒：雖然夜期成交張數由啱啱推出嘅日均幾百張，升到依家日均四千幾張，但係都仲同日期差天共地啊！
郭：係啊！喺日期時段，大期同細期會比較貼價，但係夜期就會有偏差，而且夜期「死穴」係擘價大、成交張數少，所以好難做到套戥對沖，亦唔啱玩超短炒，只可以波段性咁炒，一旦捉錯路嗰陣止蝕成本都會高咗！另外，我好興買認購期權保護期指沽盤，即係用贏就無限、輸就有限（只輸期權金）嘅方式去保護無限風險嘅投資，令自己無後顧之憂，所以如果夜期有期權玩就好啦！
Kitty：你有乜夜期心法可以傳授畀我？
郭：唔少技術指標反映歷史，喺期指世界入面容易令你高買低沽，輸面極高，你可以忽略呢啲指標！玩期指最緊要跟大勢，以日線圖做輔助，喺較阻力位高時沽、較支持位低就揸。預測趨勢就要學睇升段、跌段、調整、反彈，例如跌多升少，即反覆向下，要以沽為主啦，不過睇唔到趨勢就乜都唔好做喇！
炒單邊入市價靚
彩兒：夜期推出已經年半有多，成日都畀人話冷清。
潘：夜期成交淡靜難轉身，而且隨機性強，好難攞市場數據做分析，再者市場深度明顯未夠，喺七月嗰陣我曾經想喺夜期落盤做20張大期，但係一落5張就已經縮咗二十點，如果以我普遍一次落超過30張嚟講就唔啱玩啦，散戶投資十張以內嘅話問題就唔大。
不過，喺出現大升跌嘅極端日子，夜期嘅入市價多數比日期靚！依家夜期收市時間唔湯唔水，下星期加時有望追貼啲歐美股市發展，若然第日可以加時到12點半，就可以緊貼歐洲收市時間，有機會搶到歐洲對沖盤生意，從而令成交活躍啲。
睇成交均值避挾倉
Kitty：畀大戶挾倉都算係散戶事件簿嘅十大慘事之一，有乜方法避開？
潘：散戶不妨可參考成交均值（VWAP）或估計結算價（EAS）呢類數據，除咗有助避開大戶挾倉，亦可以幫手決定應唔應該持倉過夜。期指走勢偏離成交均值，意思即係有大戶挾緊倉。若收市價遠高於成交均值，第二日便會裂口高開，形成單邊市；若收市價遠低於成交均值，第二日便會裂口低開；若收市價貼近成交均值，第二日個市就會傾向牛皮，呢個指標嘅訊號有八成機會正確，贏面算大。
之但係，期指係零和遊戲，散戶緊記唔好Over Trade同搏命，瞓得唔好就等於注碼太大啦，只有目標明確同埋有完善風險管理，時刻訂立止蝕位，贏面先會大o架！
學數Cycle博轉勢
彩兒：你年內炒日、夜期投資回報有三成，究竟係點樣練成一身咁厲害嘅炒功o架？
任：我廿三、四歲就開始睇書同搵資料自學o架喇，好幾年後開始做投資，原先係玩開外匯嘅，但係要長期通宵實在太辛苦，所以喺九八年就轉玩期指，十幾年嚟都係靠「數Cycle（周期）」嘅方式計算值博時間同價格，再等極高或極低位落盤，呢個估算方式成功率有七成，養活咗我o架，哈哈！
Kitty：數Cycle？唔通你屈指一算就得？
任：其實有套叫PhiMatrix 嘅軟件係幫手分析嘅入門工具，我無咗佢唔得o架！重點只係索價廿幾蚊美金，真係好平。我會用佢框住圖表做分析，可以慳九成「做功課」時間。
趁美股挫夜期撈底
彩兒：你近排夜期戰績掂唔掂？
任：我一星期只係喺夜期落盤一至兩次，主要係用嚟平倉或開倉，唔炒即晚。另外通常每晚都會Set定盤，每當出現約300點溢價或以上就會自動掃貨，期間我會照去街或食飯，間中用手機Mon住。十月算多日子有機會賺，都幾開心，十六號晚仲算係經典添！因為當晚美股急挫，令夜期最低位去到22,545點，低水約400點，真係非常吸引，我當晚入咗8張左右大期，第二朝日期開市彈到22,938點左右就即刻平倉食胡。
Kitty：夜期就加時，夜晚咁緊張會唔會失眠？
任：我間中會利用美國標普細期對沖，或用「Lock倉」策略製造安全網。好似十月三日咁，夜期走勢受累佔中活動，我喺日頭已買入22,600點行使價嘅遠期認沽期權，晚間就趁22,600點水平買入期指進行Lock倉。
期指散戶點睇？
馬先生：「我多數都係玩日期，好少玩夜期，因為夜期擘價大，賺埋賺埋都唔夠，對我哋唔着數。依家主要有兩大策略去玩期指，首先係『做單邊』，只集中睇升市或跌市，睇單方面嘅趨勢可以令我哋個心定啲同集中啲，更加重要嘅係可以減低風險，防止畀大戶挾。至於另一個策略就係做『牛熊盤』，一早定好個止賺、止蝕位，Set好咗就可以有電腦幫手，有咩事可以自動幫我Cut，減低風險。」
陳先生：「玩期指分分鐘連神仙都企唔穩o架，所以依家每日都會畀自己一個目標，大概賺4位數字左右，提自己收割咗就要離場。好似上星期四，我朝早10點半已經做咗兩單Meet到個Target，咁咪可以收檔囉。至於夜期嗰邊我就比較少玩，一來夜晚都攰啦唔想放咁多時間入去，二來依家夜期未有期權，冇得保護住個夜期，好唔穩陣，所以夜期我都淨係用嚟等收割。」
彩兒 Kitty
若有料報畀彩兒同Kitty或有嘢問，可電郵money.biz@on.cc