內地華遠地產嘅董事長任志強將會喺下個月卸任，退位讓賢，但好多人都知道佢一向為人高調，今次雖然退下華遠戰線，不過就「退而不休」，而佢自己亦話會保持住對市場嘅敏感，繼續活躍喺房地產圈子。
前晚，華遠地產公布咗新一屆董事候選人名單，揀咗孫秋艷、孫懷傑、楊雲燕、張蔚欣、唐軍同陳曉玲做公司第六屆嘅非獨立董事候選人。咦，點解現任董事長任志強榜上無名嘅？佢就喺微博度解釋，今年五十三嘅佢打算退休，等到下個月股東大會通過新董事名單，咁就可以正式卸任喇。
而同佢老友鬼鬼嘅SOHO中國（00410）董事長潘石屹亦都戥佢高興，仲喺微博度留言話「歡慶＠任志強光榮退休」。
不過心水清嘅各位就會知道佢今次嘅卸任都並非真正嘅退休，皆因佢仲身兼五職，尋日喺記者會度話，會繼續擔任中國房地產協會、房地產研究院副會長、全聯房地產商會執會長、阿拉善生態協會會長同金融博物館書院院長，真係名副其實嘅「退而不休」。
任志強仲好幽默咁講笑話要整間房地產研究院，畀個院長自己做，得閒時再做埋作家，搞吓學術研究喎。雖然外界都叫佢做「任大炮」，因為佢每次言論嘅「創作力量同幻想會嚇你一跳」，但絲絲就有啲擔心佢喇，佢咁不甘寂寞，退休之後分分鐘忙過之前？
余絲韻