絲絲講場：港交所請「睇場」專捉亂「通」

其中「為咗滬港通，真係可以去到好盡」嘅港交所（00388），絲絲就發現，佢哋要專登請人（目及）實滬港通嘅交易活動，確保呢個史上大製作，運作暢順。

招聘高級副總裁帶隊

港交所將會招聘市場營運科高級副總裁，專門負責滬港通交易活動嘅市場監察。

港交所講明，要求要有好高水平嘅市場監察，適合人選將會領導一小隊下屬，每日監察滬港通北向及南向交易活動，並會向市場營運科主管匯報，而且仲要同監管機構及港交所其他部門合作，確保有效嘅市場監管工作。

監察北向活動「防霸額」

睇嚟，港交所真係好重視滬港通嘅市場監察工作。事實上，絲絲早前已聽聞，由於預料大戶對北向交易（買賣A股）需求強勁，投資額度好快「爆滿」，為防霸佔額度，港交所將會加強監察北向交易活動。

所以，如果有人以為滬港通係新事物，想乘機渾水摸魚，睇怕都唔係咁容易！

余絲韻