Market Insight：中廣核美亞等注資

至於一度落到年半低位1.86厘的十年美債孳息亦都一樣，上周五已反彈至2.2厘水平。美股恐慌指數（VIX）上周中曾飆升至31.6的近三年高位，周五大幅回順至21.9，似乎投資者對於歐洲經濟疲弱拖累環球經濟復甦及美國企業盈利的憂慮，已經在市場中完成反映。

港股上星期日升日跌，總結整周累積跌65點或者0.3%，收23,023點，險守兩萬三關口。睇番過去幾個月，恒指由九月初高位25,362點，輾轉跌到低位22,565點，甚至跌穿滬港通消息公布前水平。在下已經講過，太多人一廂情願以為○七年港股直通車刺激大市急升的歷史可以重演，結果齊齊表錯情。

古勝冇點你

萬里長空

散戶又再表錯情

事實上，滬港通確有利AH股差價收窄，觀乎過去兩個月，A股跑贏了大部分成熟市場指數，政策目的無疑係為封閉的A股引入更多外資機構投資者參與，也配合祖國逐步開放資本帳。

反而市場最憧憬的內地投資者南下炒港股，由消息公布以來港股先抽升後跌凸的反應，真正幫助究竟有幾大，唔使畫公仔畫出腸。即使個別內地知名而A股又無的企業，好似騰訊控股（00700）、聯想集團（00992）、康師傅（00322）一類，會多咗一批內地捧場客撐場，但對於港股整體市值的提升，滬港通的幫助應該並唔明顯。

至於之前港交所（00388）講過，話滬港通落實後，會畀兩個星期時間證券行去預備，但上星期仍然無聲氣，意味滬港通趕得切月底開車的機會已十分渺茫。不過阿爺想A股投資者更國際化之心，是路人皆見，A股可以入到MSCI一類的環球機構投資者指標指數，更加係恨到出面，所以等技術解決，滬港通遲早都會放行。

中國銀行（03988）為內銀發優先股增資擴股揭開序幕，最終65億美元的優先股，以6.75厘定價，較上半年市場預期的8至9厘，甚至八、九月時估計的7至7.5厘都要低。

如此結果，到底純粹因為今年環球國家主權債券息率級級落，好息之徒買到無嘢好買，抑或相信內地銀行資產質素，最終在阿爺出手包底下，唔會衰得去邊？看來兩個因素同時存在。

有些少意外的，反而係中行優先股咁樣定價，但正股股價上星期卻升得咁少。不過無論如何，短期想搵低風險而值博率相對較高的選擇，內銀應該係首選。

雅居樂供股焗跟

雅居樂（03383）五供一計劃終止，取而代之係八供一計劃，計過度過，供股集資額加埋本身現金，十二月的過度性貸款問題唔大，至於未來銀行會唔會趁火打劫，令利息成本上漲仲係後話。反而暫時仲未知主席陳卓林之後會有乜下文，尤其是會唔會觸發到期銀行貸款及債券的控制權違約。

不過，講到底，若然銀行真係逼Call loan，最終變壞帳大家都無好處，由雅居樂的公司債上星期明顯見底反彈，可見債券玩家明顯無股民咁悲觀，基於近排股價的急瀉，現價一四年市帳率已經跌到近0.35倍，除非得三、兩手供完變碎股，否則實在無乜理由唔去供等攤薄。

半新股中廣核美亞（01811）在近期跌市中都算硬淨，十月以每股1.71元上市，掛牌首日的1.88元經已係低位所在，之後見過2.46元，上周五收2.18元，升五格。論往績估值，中廣核美亞唔算平，但勝在集資七成會用來收購母公司資產，中短期內，股價都有注資概念頂住。

集團現時手上發電機組中，潔淨及傳統能源比例大約為52%及48%，中央決心要向環境污染宣戰，傳統石化燃料發電行業的增長，未來肯定不及潔淨能源快，母公司又係全國三間擁有核電項目開發技術企業之一，令到中廣核美亞在行業中具有技術優勢。

上周四股價試2.08元後企穩再發力，如果今個星期能夠重上2.2至2.3元，短炒可以留意。

滬A消息夠詳盡

滬港通開通在即，「東網Money18」已設有滬港通專頁，並有滬A報價及專家評論，可讓讀者掌握最快最新市場資訊，萬勿錯過。

古勝