絲絲講場:中金董事長都話要走?

真係一不離二,中國首家中外合資投行中金公司(CICC),前日至公布國務院前總理朱鎔基之子朱雲來辭去總裁及管理委員會主席之職,尋日就傳董事長金立群將在年內離職,仲話會出任籌建中嘅亞洲基礎設施投資銀行高層,真係似層層咁。

金立群傳離職屬「巧合」

市場就話,金立群同朱雲來嘅離職冇關係,純粹時間上巧合啫。金立群喺內地地位好高,除咗做過中投公司監事長、財政部副部長之外,亦都同做過世界銀行中國副執行董事。

iBank老友話,無論係朱雲來,定係金立群嘅離職,都唔算係驚天動地嘅事,大家預咗o架喇。絲絲數數吓手指,計埋經濟學家彭文生、中金投資銀行業務委員會執行主席蔣國榮嘅離職,呢年離開中金嘅,個個都咁重磅,係咪件件都係獨立事件呢?

余絲韻