絲絲講場：香港富豪變科網先鋒

Ipsos尋日發布咗亞洲富人最新研究，訪問嚟自唔同地方一共18,830位富裕人士（其中1,761位嚟自香港）。

調查發現香港富裕人士經常用數碼產品，好似智能電話同平板電腦跟朋輩溝通：當中57%人用電話發圖像訊息、78.1%用電話閒聊及發送即時訊息，36.8%仲會用視像通訊。

佢哋仲會利用流動裝置瀏覽媒體：閱讀要聞、財經新聞佔45.4%、閱讀電子報章佔52.7%，電子雜誌就佔37.6%、欣賞電影或者自選節目亦佔38.9%。

逾三成愛流動理財

香港富裕人士亦都傾向透過流動裝置使用網上銀行（37.5%）同埋購買產品及服務（33.8%）。唔怪之得叫香港做「亞洲流動通訊之都」啦。

雖然今年Ipsos的研究調查有別上年，但Ipsos執行總監呂詠琦（Clare）睇番今年整體情況，都認為香港富人消費力無以前咁強，可能同內地唔鼓吹送禮有關。

睇番成份調查報告，除咗香港之外，其他地區固然各有特色，好似新加坡、台北同首爾就分別係旅遊、權力同奢華之都。Clare仲話，可能因為科技日益先進，不論何時何地更容易透過科技產品接觸媒體，亞洲富人每日閒閒哋都用5.7小時接觸各類媒體，由於公餘時間緊絀，大部分都傾向用科技產品瀏覽。

余絲韻