巾幗不讓鬚眉！美國第二大基金公司富達投資，將會由現年五十二歲、人稱「Abby」嘅女總裁約翰遜（Abigail Johnson）代替老竇接管，成為資產管理業界少有嘅女舵手。
至於掌舵富達長達三十七年、現年八十四歲嘅老約翰遜就留任總裁，繼續參與呢間由佢老竇六十八年前創辦嘅公司。
其實今次世襲係喺預期之內，因為富達早喺前年成功踢走晒有意角逐CEO嘅非約翰遜家族成員，之但係Abby有個細佬，點解老約翰遜唔傳位畀佢呢？消息人士就話，八八年加入富達做分析員及基金經理、一路做到上總裁嘅Abby，唔單止對富達各部門都瞭如指掌，而且處事手腕好得，將老竇嘅Idea做得妥妥當當。
唔似「債王」格羅斯等大孖沙，Abby傾向保持低調，甚至內向到啲高層都唔知點揾佢。《福布斯》就估計佢身家多達123億美元（約959.4億港元），比老竇多一倍。
迎接Abby嘅一大挑戰，係愈嚟愈多投資者轉玩被動型產品，指數基金同交易所買賣基金（ETF）極受歡迎，富達因為遲咗開拓ETF市場蝕晒章，據統計今年頭九個月走資90億美元。
雖然比起富達管理緊嘅2萬億美元嘅資產可以話唔算係乜，但相信無高層可以當無件事，睇嚟推出新業務實在刻不容緩。
余絲韻