絲絲講場:中銀兩女將「換位」諗新意

今年以嚟,樓市可謂價量齊升,唔少人都話跌眼鏡。樓市暢旺,按揭生意自然係必爭之地。中銀香港(02388)喺九月又做番按揭市場一哥,但唔可以掉以輕心,聽聞近排由副總經理周澤慈主管嘅零售銀行旗下,按揭同存款兩個部門女將對調,睇嚟應該又會有新思維。

按揭市場競爭激烈程度,大家都感受得到。伍愛施(Colet)之前喺中銀香港管按揭時,毋須依靠減按息,市佔率大部分時間都仍然能夠佔據上風。

按揭存款主管對調

今年搶攻新盤時畀其他銀行乘機喺二手市場上位,但係下半年已經收復唔少失地,依家Colet就會調去睇存款。

每個分析員都話中銀香港存款有優勢,但就唔等於毫無競爭,之前睇存款嘅葉慧文,咁多年參與存款保障委員會工作,甚至喺擴展人民幣存款方面都應該花咗唔少心機。

不過今次兩位女將調位,應該不單止業務上,連攻防偏好都唔同,大家都期待配合滬港通,中銀香港個人銀行產品會有咩嘢新搞作。

余絲韻