絲絲朋友近排新車落地，心思思諗住買番個車位自用兼投資，點知早兩日見到有報道話「新地狼死」，位處西環嘅豪宅寶翠園車位最貴要成350萬元，創近年發展商拆售一手車位最貴紀錄。絲絲自然要捉住經紀朋友問清楚啦。
不問猶自可，一問先知原來報道嚴重失實！查實今年五月，天匯有車位以424萬元成交，價錢遠比寶翠園車位高兩成啦。依家寶翠園嘅車位價，跟同區比都只係市價嚟啫。
經紀朋友話，寶翠園係聯營項目，大股東信德佔51%，而新地、新世界、廖創興都持有股權，出售車位係股東一齊做嘅決定。報道大字標題話「新地狼死」講唔通喎。
聽完朋友咁講，絲絲覺得寶翠園嘅車位都可以諗諗喎，依家資產價格飛升，仲有貼市價嘅車位，都唔易搵呀！
余絲韻