小米創辦人雷軍成日畀人話係靠山寨蘋果公司（Apple）嘅模式起家。不過有「蘋果公司設計靈魂」之稱嘅艾維（Jonathan Ive），近日就對外界將小米形容為「中國Apple」嘅講法不表恭維。
諷刺嘅係雷軍同小米，最近竟然都成為「被山寨」對象，內地甚至出現一款叫「雷軍電動」嘅新能源車，擺明借雷軍同小米「過橋」！
作為蘋果公司產品計劃高級副總裁嘅艾維，包辦iPhone、iPad以至Apple Watch嘅設計工作。佢日前出席《名利場》峰會，被問到對小米被稱為「中國Apple」有咩感覺時，就毫不客氣咁話：「我不認為這是一種（對蘋果公司）恭維，我認為這是偷竊」。
對於被指山寨蘋果公司，雷軍過去多番呼冤，叫人唔好稱呼佢做「中國喬布斯」。佢仲話自己其實都係山寨產品嘅受害者。
好似早前佢雖然否認小米有意涉足電動車，但有內地車廠仍然唔放過機會，喺上周初發布一款叫「雷軍電動」嘅新能源房車，車徽就有抄襲小米「mi」品牌之嫌。
面對山寨現象嘅橫行，小米要確保自己不被抄襲，確實有相當難度。
余絲韻