美國投資銀行Piper Jaffray尋日下晝公布咗一份最新嘅調查報告，美國有超過9成嘅青少年都會用社交媒體，而當中最受歡迎嘅就係主打分享圖片嘅應用程式Instagram。
嘩！呢個數字就連絲絲都嚇一跳，事關Instagram嘅人氣爆燈，依家有76%嘅使用比率，比年頭多咗7個百分點之餘，仲成為今次調查嘅榜首。睇返第二位嘅Twitter都只不過係59%，曾經獨佔鰲頭嘅facebook（fb）竟然跌落第三位，由年初72%佔有率跌到得番45%，唔知朱克伯格會唔會頭痛到瞓唔着呢。
雖然Instagram都畀fb收購咗，但後者明顯對前景都幾擔心，不斷出手希望力挽狂瀾。
佢早在八月份就出咗個影相App Hyperlapse，開頭都幾受歡迎 ，但過咗6個星期之後，表現似乎有啲後勁不繼。fb過去都一直自行開發唔少應用程式，但都唔多賣座。例如模仿Snapchat嘅Poke、閱讀新聞嘅Paper、以至於同Snapchat好似嘅照片分享應用程式Slingshot。
絲絲有唔少朋友都有玩fb，但呢排就聽到唔少苦水。佢哋耐唔耐就會呻話fb又轉版，搞到佢哋啱啱先研究到點用，轉過頭又重新學過。
相比起fb，Instagram雖然只係可以分享照片同影像，但就係因為呢個簡潔嘅介面同容易操作，為佢贏得唔少掌聲。其實呢，凡係愈簡單就愈多人鍾意。
本身絲絲我都不時會用facebook Messenger同朋友吹兩句水，但自從改版後fb就要我下載一個相關程式先用到。睇嚟朱克伯格真係要疊高枕頭諗清楚日後有咩便民嘅發展策略呀。
余絲韻