Market Insight：核電板塊可炒復甦

此前幾次議息，聯儲局主席耶倫以閒置勞動力為由，為加息日期無市場預期咁快殺到解說，今次賴到落去歐日經濟疲弱身上，一句到尾，是想繼續透過出口術，在美國本土就業及商貿經濟數據表現強勁下，一方面為加息預期做管理，畀市場信心聯儲局唔會大幅度的讓利率向上。

議息紀錄曝光後，華爾街三大指數急升，道指升1.64%，納指更升1.9%，美匯指數輾轉回落至85水平。過去幾日，市場對息口變化反應頗耐人尋味。上周五美國公布九月就業數據，失業率落到5.9%的六年低位，非農就業職位也扭轉八月回落態勢，增加24.8萬個多過預期。

古勝冇點你

萬里長空

反彈成交愈玩愈縮

理論上，息升預期應該升溫，實情當晚十年期美債息即市見2.48厘，收市已回到2.43厘，連日來更輾轉回到2.31厘水平，逼近八月造出的今年新低2.3厘，同年初高位3厘比較，可見愈接近聯儲局正式啟動加息的大日子，市場愈唔怕美國有大幅加息條件，市場對美國通脹及歐日經濟不明朗因素一併考慮，認為息口就算回升，幅度會相當有限。

港股以美股馬首是瞻，恒指升271點收報23,534點，惟主板成交再縮，僅650億元，唔單只係過去幾日反彈以來最奀，仲係九月十六日以來最少，連日反彈成交愈玩愈縮，二三四線股仔趁亂禾雀亂飛，但更明顯見基金開始買番幾隻估值較低的指數權重股份，中移（00941）升3.2%，友邦（01299）升2.9%，同跑贏指數，股市對佔中對經濟衝擊開始心裏有數，一度遭拋售的地產及零售股見反彈，長實（00001）、新地（00016）分別升1.3%及2%，本地零售股包浩斯（00483）、利亞零售（00831）、莎莎（00178）、思捷（00330）及JOYCE（00647）升幅介乎2至7.3%。

定息產品依然渴市

講番「息魔」，早排滙控（00005）及吉利汽車（00175）發債，一班私人銀行客戶好似螞蟻見蜜糖一樣，但認購超額太勁，多數得個吉，首發每每買唔到，要去二手市場搶貴貨。由此可見，這批被睇成半專業到專業投資者，對定息回報投資極為渴求，完全無懼美國加息殺到，多少見到佢哋同股市玩家睇法之差異。

隔晚聯儲局會議內容加埋債息走勢，證實前者確實睇啱市，君可見好息之徒都追番幾隻房產信託基金（REITs），走勢較搶眼有泓富（00808）升2.8%，置富（00778）升1.4%及領匯（00823）升1.3%。

舊年，本地REITs因個市驚加息驚過龍，統統腳軟。今年年頭美債息搶先見頂，REITs年頭升到依家，基本因素，今年香港撇除甲級寫字樓租金升幅確實笠笠哋，旺區舖租因為個人遊旅客洗錢少咗，壓力較大，像領匯及置富做公營及私營屋村商場，影響有限，依家預計息率有6厘同4厘，回報仲係吸引，其中置富同八月高位仲有距離，可以諗諗。

十八屆四中全會揭幕進入倒數，維穩氣氛下，A股又創新高，「依法治國，繼續反貪腐」的主題，濠賭股唔多睇好之外，古勝真係一時間無乜idea，索性還原基本步，搵番國策股嚟炒，新能源股尤其核電股昨日表現突出。

哈電值博率稍秤先

自日本福島核事故，中國核電投資跌到谷底，今年上半年，國家能源局已提出陸續恢復核能投資，配合國家防治大氣污染的國策，上海電氣（02727）上半年的核設施訂單，新增15.5億元人仔，由去年同期的7,400萬元人仔大幅回升，第三季情況延續，接近7億元人仔。唯一問題是核心設施短期佔整體收益比重唔多，故心理幫助大於實際，近20倍預期市盈率，高追的動力源自核電行業復甦的故事。

另外兩隻選擇東方電氣（01072）及哈爾濱電氣（01133），都有同樣情況，既然明知純粹短期炒概念，八月中，半年成績表一出，股價撻咗落嚟的哈電，追落後博反彈條件較好，短期4.5元應該見咗底，睇吓今次跟住核電故事翻炒，可唔可以挑戰5.5元雙頂阻力，甚至更高水平。

古勝