打機唔係絲絲嘅強項，遊戲由邊家公司開發更加唔會留意。不過唔講又唔覺，作為內地網絡巨頭嘅騰訊（00700），以遊戲業務嘅營收計已穩坐世界第一！就連蘋果公司、Google、微軟又者索尼呢啲科技巨企，都唔係騰訊嘅對手。
美國分析機構Newzoo，定期發布遊戲行業嘅數據，Newzoo近日嘅數據顯示，繼今年首季後，騰訊喺上半年再次登上遊戲業務嘅世界一哥，佢哋上半年同遊戲相關嘅收入，按年升40%去到273億港元，增長同營收明顯跑贏排第二、三嘅西方遊戲大廠EA同Activision。
至於同時生產遊戲主機嘅索尼同微軟，唔計算主機嘅銷售收入，嚟自遊戲軟件嘅收入，只係排名全球嘅第四同第五。
至於蘋果公司及Google，雖然上半年嘅遊戲收入按年分別增長64%及111%，但即使將兩者嘅收入加埋，合計嘅金額亦只係得257億港元，同騰訊嘅營收規模有明顯距離。
由於內地嘅遊戲機市場仲未完全對外開放，大家都知騰訊嘅遊戲業務係靠網遊及手遊為主。睇埋Newzoo這份報告，肯定會更加明白，網遊同手遊嘅市場潛力有幾大！
余絲韻