絲絲講場：女版馬雲果斷成就阿里
阿里巴巴三劍俠（馬雲、蔡崇信及陸兆禧）好多人都識，其實仲有一位人物畀大家忽略咗，而且仲係一名女將添，就係身兼首席人才官及小微金融首席執行官嘅彭蕾。作為阿里系內金融業務負責人嘅佢，決斷嘅作風甚至可稱之為「女版馬雲」。
陸兆禧同彭蕾，堪稱馬雲嘅左右護法，彭蕾負責阿里嘅人才事宜，亦負責小微金融嘅執行，由大家熟悉嘅支付寶，到籌組中嘅網商銀行都係佢嘅範疇。
彭蕾敢於批評員工
今時今日彭蕾已經係馬雲嘅得力助手，甚至畀外界認為係馬雲一手培育嘅接班團隊成員。不過原來當初決定加入團隊，只係覺得同馬雲共事比較好玩，而唔係特別相信佢對互聯網及電商嘅宏圖構想。
原來，馬雲提出嘅唔少業務發展構思，彭蕾同旗下嘅合作團隊，當初可能會覺得喺理性分析上唔太可行，但透過馬雲激發嘅非一般思維，好多構想都成為事實。
喺對待員工態度上，馬雲較為心軟，「他是一個非常不能去批評下屬嘅人」，傾向委婉相告，彭蕾就鍾意用直接方式，批評員工嘅錯誤。
余絲韻