絲絲講場：神冠踩空軍無膽對質

畀人唱，緊係唔開心啦，神冠主席周亞仙一早現身股東特別大會，終於可以親口反駁，佢淡定咁回應Emerson Analytics嘅狙擊事件，坦言「真的假不了」，仲話對方「唔敢見我」。

回購股份 連升三日

Emerson究竟係咪唔敢見佢，絲絲就真係唔知，不過淨係見神冠多番出通告逐點回應，兼且用真金白銀落力回購股份，就知神冠唔敢輕視啦。

佢哋隔空駁火已經一個月，投資者好似已經冇乜負面睇法，睇神冠股價就知啦，除咗上周一復牌日跌過外，已連升三個交易日，以尋日收市價計，只係比上月停牌前價位微跌1.47%，跌幅咁細，應該同公司回購行動有關。

斥狙擊報告唔熟行

就算Emerson Analytics加碼唱衰公司，但神冠小股東似乎都唔多擔心，難怪周亞仙咁錫班股東，保證上市約40%派息比率嘅政策不變。

周亞仙講到明，同Emerson Analytics素未謀面，齋睇報告內容就知對方唔熟行業運作，所以「我估佢哋都唔敢見我！」家陣公司就將事件交由律師處理。神冠股價跌幅收窄咗咁多，Emerson Analytics唔知有冇損傷呢！

余絲韻