孖妹S檔案：亂市投資 以守為攻
警察啲催淚彈搞到佔中示威者一殼眼淚，港股連跌四日都令孖妹接近每日以淚洗面，好彩上星期五卒之止到血咋！不過我哋都仲要睇清形勢，事關今個月仲要迎接滬港通啟動、內地四中全會、美國退出量寬，仲加埋歐洲接力放水添，所以煩惱緊點樣喺亂市下屹立股場。
佔中僅藉口 最驚加息
蔡：新邦証券執行董事 蔡佑徽
彩兒：有乜因素影響得港股最犀利？
蔡：佔中只係港股跌市藉口，美股走勢先係牽動港股嘅最大因素。美聯儲局今個月底會退出量寬，16,800點同16,300點係美國道指嘅兩個重要支持位。美匯不斷上升，反映美聯儲局即將加息，或者會令美市出現深度調整，一旦跌穿後者就結束升市，有下試14,000點嘅危機。恒指喺22,000點有大支持，但係今季投資就要見步行步，不容樂觀。
Kitty：想穩陣啲，下一步可以炒啲乜？
蔡：佔中事件明朗化，恒指22,000點係六年以來嘅重要支持位，值博率幾高，建議散戶依家可趁低位買過去半年強勢嘅藍籌股，好似比亞迪（01211）、聯想（00992）、中石油（00857）同埋中國電信（00728）等，四中全會或者有新一輪環保政策出台，相信比亞迪有機會受惠利好政策而跑出，可以做首選！
好多投資者擔心美國加息會影響股市，不過友邦保險就可能喺加息嘅利淡因素中免疫，因為加息有利佢投資增值，即使喺加息前，佢嘅盈利回報亦可保持增長，而且該公司股價喺藍籌股中算硬淨，建議喺40元水平吸納。
內房博彈 首選潤地
彩兒：我想揀啲股價跌到殘嘅股份博彈，你有乜心水？
蔡：內地上周五進一步放寬限購同限貸措施，我相信措施會逐步開放，而內房股股價已跌得低殘，喺政策憧憬下值得考慮，但係就只適合進取嘅投資者，首選行業龍頭華潤置地（01109），貪佢彈得夠快！
不過，一眾本地零售股好似佐丹奴（00709）及莎莎國際（00178）等雖然跌得甘，但係佢哋受累內地個人遊增長放緩，而且佔中對佢哋嘅影響強度同時間仲係未知之數，我估計持倉者會「先沽而後快」，不宜撈底！
分清長短線 燙平波幅
唐：資深財務策略師 唐德玲
Kitty：呢排咁多突發事件，點先可以保住我副寶貝身家？
唐：投資理財一定要設定短、中、長期嘅目標。喺長線投資部分，訂立投資方案時應該預計定未來或者會出現若干突發事件，好似政局動盪，所以普遍應利用分段投資法或平均成本法，用定時定額方式投資基金或股份。事關只需選擇長遠走勢向上嘅市場，市況短期波動其實唔會嚴重影響回報，呢個方法相對穩健及安全，投資者唔需要因應個別嘅市場波動而調整組合。
保留彈藥短炒盈富
彩兒：以短線投機嚟講，如果預期大市就嚟會急跌可以點做？
唐：投資者應預先沽出部分持股，預留現金謀求短炒機會，睇時勢做人。以今次佔中為例，持續嘅示威已令大市喺上周下跌613點，要撈底撈得安全大可分段入市，唔應該孤注一擲，以免綁死資金，再穩陣啲可以揀香港股票基金或盈富基金（02800）博大市反彈。
Kitty：依家有乜市場值得我哋依靠？
唐：因為美股估值過高，所以我比較睇好亞洲市場，中港市場仲抵買，其中滬綜指目前離○七年6,124點高位仲有六成距離，建議投資者買入A股ETF(交易所買賣基金)。對於踏入中年嘅散戶，我建議目前趁機分段買入防守性高嘅股份，好似大藍籌、房地產投資信託基金（REITs）等，既可謀求資產增值又可收息，從而自製穩定收入。對於後生仔女，我建議選擇高增長嘅藍籌股，好似騰訊（00700）同友邦保險（01299）。
匯市變天 細價股散水
蘇：招銀國際策略師 蘇沛豐
彩兒：恒指調整咗咁多，有乜股份散戶見到要即閃？
蘇：佔中示威持續唔係拖累港股下跌嘅單一元兇，美匯急升、美股見調整同日圓匯價偏軟等因素吸引本港資金流向日股，事實上整個新興市場嘅走勢都唔理想，建議依家揸重貨，特別係買咗未有盈利支持嘅三、四線股嘅散戶要先減持；至於一啲盈利唔受佔中事件影響嘅中資股，即使跟隨大市展現調整，都唔使太擔心！
零售、酒店及地產股的行業前景在佔中事件中首當其衝，固然對投資者心理造成打擊。不過，伊波拉病毒疫情蔓延對股市嘅影響都唔應該睇小，散戶應先避開國泰（00293）同國航（00753）等航空股。另外，雖然近期A股強勢，以致H股相對落後，要留意部分較A股具折讓的H股屬「垃圾股」，未有盈利支持，走勢會脆弱啲，投資者應審慎選擇；至於較A股具溢價的H股更加應該先避開，目前未宜沾手。
進取吼騰訊 110靚價
Kitty：想喺股海覓寶，可以吼啲乜？
蘇：持有較多現金嘅投資者依家可以考慮開始入市撈底，進取嘅散戶可吼騰訊。佢係滬港通概念股之一，吸引唔少內地投資者青睞，同時顧及內地科網發展一日千里，騰訊同阿里巴巴集團嘅龍頭地位穩固，難有具威脅性的競爭者出現，基本因素幾好，目前係吸納機會。不過，騰訊超賣程度唔及恒指，可以等回落到110元左右先伺機買入，中線目標130元。
要「穩陣之選」就可以睇港鐵（00066），佢嘅鐵路業務平穩，實現平穩現金流，而且新路線就快開通，意味即將有地產項目招標，相信地產業務有睇頭，所以港鐵可以話係穩健與增長兼得嘅選擇。公司股價近月沿上升通道反覆向上，但因示威而出現股價調整，喺30元水平有支持，建議喺現行水平收集，中線可睇33元。
Kitty、彩兒
若有料報畀彩兒同Kitty或有嘢問，可電郵money.biz@on.cc