絲絲講場:阿伯加按銀行無情講

聯儲局前主席伯南克卸任後講場Talk都袋25萬美元(約195萬港元),多過在任時年薪足足四分之一,咁疊水,以為往後過皇帝式生活No Problem啦!點知伯南克前日去芝加哥出席會議,大爆最近加按國會山莊間屋失敗咗!究竟係真唔係呀,話晒你三場QE起勢放水,買按證都買到手軟,而且○九同一一年都試過加按喎。

無正職收入無得傾

面對哄堂大笑,伯南克強調件事珍珠都無咁真,證明美國經濟復甦,按揭市場依然過緊,而呢種緊並非只係按揭利率升番咁簡單,係有欠靈活。

話說華府接管「兩房」後,嚴格監管銀行批按同風險,於是樣樣要跟準則做,成件事徹底自動化公式化,上網入啲資料就知有無得批,銀行按揭主任逐漸成為歷史。問題係,伯南克演講活動純屬Freelance,就算通街都知好搵過聯儲局一哥多多聲都好,都係無穩定收入,搞到電腦乜都批唔出,唔似以前咁可以同銀行職員有商有量。

政府承按縮皮難資助

至於政府嘅按揭資助,伯南克可能一樣申請唔到,因為一一年「兩房」將承按上限由接近73萬美元劈到62.5萬美元,以伯南克同一年按樓借67萬幾美元計算,如今佢都唔合資格,況且就算佢想借,如果之前嗰筆數都未找夠,亦好難獲批。

可能伯老都未必估到市場變化會咁複雜,不如索性寫落自傳度警惕吓後世啦!

余絲韻