新股上市發盈警再破紀錄！強泰環保（01395）上市第二日即發盈警，話半年溢利受到上市費用所累而大減，雖說佢喺招股書都有披露過，之但係呢種灰色地帶，散戶咪又中伏囉！
強泰環保係內地一家污水處理服務供應商，上個禮拜五先至掛牌，可能因為「細細粒」，加上都有啲概念，招股反應認真唔錯，超購556倍，第一日掛牌表現都省鏡，勁升七成，帶挈散戶一手都賺成差唔多兩千銀。
之不過，只係上咗市第二個交易日，強泰就已經出Warning，話今年首五個月純利畀舊年大減，原因就係上市產生嘅專業費用所涉嘅行政開支大增，仲講明招股書已經提過。不過呢家公司招股上市又無開記招，管理層連解畫都慳番，黃頁電話簿咁厚嘅招股書，九月頭先至放上網，絲絲好懷疑有幾多人咪過本書。
成日話要加強立法監管新股，之但係呢種已經披露咗喺招股書嘅資料，又應該如何自處呢？事實上已經唔係第一次，好似之前隻「史上超購王」Magnum（02080）亦喺上市後無幾個月都發盈警，其中一個原因都係話受上市費用影響。呢種「魔咒」，係咪要正視一下呢？