絲絲講場：新地垂直跑遍港滬
唔經唔覺新地（00016）搞嘅跑樓梯籌款活動經已嚟到第三屆，絲絲仲記得幾位高級管理層去年跑樓梯時嘅英姿。今年個比賽將會加碼，除咗叫大家跑環球貿易廣場（ICC）之外，仲會呼籲各好手跑埋上海國金中心。
慈善之餘有益身心
新地副董事總經理黃植榮就話，今屆賽事除咗為籌款之外，仲希望能夠吸引多啲人去體驗跑樓梯嘅好處，所以今屆賽事會新增青年組嘅隊際接力賽，以及「滿FUN體驗」組鼓勵10歲或以上小朋友同父母一齊參加。
好多人都驚跑樓梯會傷膝，不過大會嘅諮詢醫生麥耀光就話，落樓梯時膝頭承受體重嘅三倍，確實唔好，但上樓梯就唔會傷膝。而跑樓梯一個鐘可消耗500卡路里，每日跑兩段樓梯，一年就可以減肥6磅，並且鍛煉心肺可延年益壽，係一項唔錯嘅運動。
現時垂直馬拉松世界巡迴賽女子組第一名Suzy Walsham就話啦，佢每星期會練習8至9次，除咗跑步做Gym，仲會去搵條樓梯嚟跑。佢話香港咁多高樓大廈，大家唔應該浪費，仲畀個貼士大家，做多啲下蹲嘅肌肉訓練，有助上樓梯快啲。