絲絲講場：庫克訪華有機心

尋日內地市場傳出，蘋果公司CEO庫克受清華大學邀請，會喺十月二十三日訪華，因為時間敏感，市場預計佢今次行程，大有可能係為配合iPhone 6嘅推出，專程到內地進行「督師」，到時仲隨時加插「參觀門市」之類嘅行程，幫iPhone 6同6 Plus促銷。

iPhone 6「雙十」未必有

早前市場傳出內地會喺十月十日正式發售iPhone 6同6 Plus，最平嘅機款叫價由5,288人仔起跳，消息令本地炒家勁驚今次會「炒燶機」。

之不過，騰訊科技尋日又引述三大電訊商嘅消息話，如果真係十日發售，依家應該已收到通知做好準備，但Apple仍然冇聲氣，相信係流料居多。仲有電訊商推斷，按規定流程睇，iPhone 6同6 Plus最有可能發售嘅時間係十月尾、十一月頭。

萬一未批 可親任說客

今次庫克傳出應邀喺十月二十三日訪華，出席清華大學經濟管理學院顧問委員會會議，因為時機巧合，引發市場諸多聯想。有人就覺得佢今次訪華醉翁之意不在酒，九成九都係為iPhone 6進入內地市場「督師」。

萬一到嗰時工信部都仲未完成入網許可證審批，庫克就可以親自出馬，展開一輪政府公關，為新機上市排除障礙。

余絲韻